ஓசி என்றால் என்ன? இந்த வார்த்தை எங்கிருந்து வந்தது?

அரசு உள்ளூர்ப் பேருந்துகளில் மகளிருக்குக் கட்டணமில்லாப் பயண வசதி வழங்கப்படும் என்ற தேர்தல் வாக்குறுதியை நிறைவேற்றும் வகையில், திமுக அரசு ஆட்சிப் பொறுப்பேற்றதும், தமிழகம் முழுவதும் உள்ள அரசுப் போக்குவரத்துக் கழகக் கட்டுப்பாட்டில் இயங்கும் சாதாரணக் கட்டண நகரப் பேருந்துகளில் பயணிக்கும் பணிபுரியும் மகளிர், உயர் கல்வி பயிலும் மாணவியர் உள்ளிட்ட அனைத்து மகளிரும் கட்டணமில்லாமலும், பேருந்துப் பயண அட்டை இல்லாமலும் பயணம் செய்வதற்கான அறிவிப்பு முதல்வர் ஸ்டாலினால் வெளியிடப்பட்டது.

இதற்கான அரசாணை வெளியிடப்பட்டுள்ளது. அதன்படி, நகரப் பேருந்துகளில் மகளிர் கட்டணமில்லாமல் பயணம் மேற்கொண்டு வருகின்றனர். திருநங்கைகளும் கட்டணமில்லாமல் பயணம் செய்ய வழிவகை செய்யப்பட்டுள்ளது. இந்த திட்டத்தின் கீழ் லட்சக்கணக்கான பெண்கள் பயணம் மேற்கொண்டு வருவதாக போக்குவரத்துத்துறை தெரிவித்துள்ளது.

முதல்வர் ஸ்டாலின் அறிவித்து வரும் திட்டங்கள் பொது மக்களிடையே பாராட்டுகளை பெற்று வருகிறது. குறிப்பாக, பெண்களுக்கான கட்டணமில்லா பேருந்து பயணம் மிகுந்த வரவேற்பை பெற்றுள்ளது. இந்த திட்டமானது பெண்களின் வளர்ச்சிக்கு வித்திடும் சமூக புரட்சி திட்டம் என பலராலும் பாராட்டப்பட்டு வருகிறது.
ஆ.ராசா விவகாரம்: ஸ்டாலின் பம்முகிறாரா? பதுங்குகிறாரா?
இதனிடையே, அண்மையில் நடைபெற்ற பொதுக்கூட்டம் ஒன்றில் பேசிய உயர்கல்வித்துறை அமைச்சர் பொன்முடி, “இப்ப பஸ்ஸுல எப்படி போறீங்க. இங்கிருந்து கோயம்பேடு போனும்னாலும், வேற எங்க போனும்னாலும் ஓசி. ஓசி பஸ்ஸுல போறீங்க.” என்று பேசினார். அவரது இந்த பேச்சு சர்ச்சையாகியுள்ளது. பொன்முடியின் பேச்சுக்கு கடும் கண்டனங்கள் எழுந்து வருகின்றன.

இந்த நிலையில், ஓசி என்றால் என்ன என்பது பற்றியும், அதன் வரலாறு குறித்தும் நாம் அறிந்து கொள்ளலாம். ஓசி என்பது தமிழ் வார்த்தை அல்ல. இதன் பூர்வீகம் ஆங்கிலேயர்களின் கிழக்கிந்திய கம்பெனியுடன் தொடர்புடையது. ஆனால் தமிழகத்தில் பரவலாக பயன்படுத்தப்படும் வார்த்தை இந்த ஓசி. பிரிட்டிஷ் ஆட்சியாளர்கள் இந்தியாவில் ஆட்சி புரிந்தபோது, அலுவலக ரீதியாக அனுப்பப்படும் கடித்தங்களில் On Company Service என்ற முத்திரை இருக்கும். அதற்கு பணம் கட்டத் தேவையில்லை. அந்த கடிதங்கள் கட்டணமில்லாமல் இலவசமாக அனுப்பப்பட்டன.

இதுவே OC Service என்றும் OC என்றும் அழைக்கப்பட்டது. நாளடைவில் அது OC - ஓசி என்று மருவியது. ஆங்கிலேயர்கள் கட்டணமில்லாமல் இலவசமாக அனுப்பியதால், ஓசி என்றால் இலவசம் என்றும் கருதப்படுகின்றது. நேரடி பொருள் இரண்டிற்கும் ஒன்று என்றாலும் அதனை பயன்படுத்தும் விதத்தால் இலவசம் என்று மட்டும் அர்த்தப்படமால், ஏளனமான அர்த்தத்துடன் புழக்கத்தில் உள்ளது.