அரசு ஊழியர்களுக்கு தீபாவளி போனஸ்: கோட்டையில் என்ன நடக்கிறது?

தீபாவளிக்கு இன்னும் சில நாள்களே உள்ள நிலையில் தமிழக அரசு பொதுத்துறை நிறுவனங்களில் பணிபுரியும் ஊழியர்களுக்கு இன்னும் தீபாவளி போனஸ் அறிவிப்பை வெளியிடவில்லை.

கொரோனா காலகட்டத்துக்கு முன்னர் 2018, 2019ஆம் ஆண்டுகளில் எடப்பாடி பழனிசாமி தலைமையிலான அதிமுக ஆட்சியில் லாபம் ஈட்டும் பொதுத்துறை நிறுவனங்களில் பணியாற்றும் ஊழியர்களுக்கு குறைந்தபட்ச போனஸ், கருணைத் தொகை என 20 சதவீதம் தீபாவளி போனஸ் வழங்கப்பட்டது. நஷ்டத்தில் இயங்கும் நிறுவனங்களுக்கு 10 சதவீதம் போனஸ் வழங்கப்பட்டது.

கடந்த ஆண்டு கொரோனா பொது முடக்கத்தால் சில மாதங்கள் பல்வேறு நிறுவனங்கள் இயங்காமல் இருந்தன. அதனால் கடந்த ஆண்டு அதிகபட்சமாக 10 சதவீதம் போனஸ் தான் வழங்கப்பட்டது.

ஆசிரியர்கள், மாணவர்களுக்கு குட் நியூஸ் சொன்ன அதிகாரி!

இந்த ஆண்டுக்கான தீபாவளி போனஸ் எப்போது அறிவிக்கப்படும் என்ற எதிர்பார்ப்பு அனைத்து அரசு ஊழியர்கள் மத்தியிலும் எழுந்துள்ளது. பாமக நிறுவனர் ராமதாஸ், தமாகா தலைவர் ஜிகே வாசன் ஆகியோர் 25 சதவீதம் போனஸ் வழங்க வேண்டும் என கோரிக்கை வைத்தனர்.

ஆனால் தமிழக அரசு இதில் என்ன முடிவெடுக்கப் போகிறது என்பது எதிர்பார்ப்பை ஏற்படுத்தியுள்ளது. கோட்டை வட்டாரத்தில் விசாரிக்கும் போது இதுகுறித்து அரசு முடிவெடுத்ததாக தெரியவில்லை என்கின்றனர். தீபாவளிக்கு இன்னும் சில நாள்களே உள்ள நிலையில் ஊழியர்கள் அரசின் அறிவிப்பை எதிர்பார்த்துள்ளனர்.

பத்தாண்டுகளுக்கு பின்னர் திமுக ஆட்சிக்கு வந்துள்ள நிலையில் முதல்வர் ஸ்டாலின் எவ்வளவு போனஸ் வழங்க உள்ளார், கொரோனா பொது முடக்கம், நிதி நிலைமை ஆகியவற்றை காரணம் காட்டி கடந்த ஆண்டு கொடுத்த அளவே இம்முறையும் கிடைக்குமா என்ற கேள்விகள் ஊழியர்கள் மத்தியில் உள்ளன. ஆனால் முக்கிய தொழிற்சங்கங்கள் எல்லாம் அவர்கள் சார்ந்த கட்சிகள் திமுக கூட்டணியில் இடம்பெற்றுள்ளதால் பெரியளவில் இதுகுறித்துப் பேசவில்லை என்கின்றனர்.

பாமக, தமாகா கூட இந்த விஷயத்தில் கோரிக்கை வைத்துள்ள நிலையில் அதிமுகவின் அண்னா தொழிற்சங்கமோ பெரியளவில் அரசின் கவனத்தை ஈர்க்க முயற்சிக்கவில்லை என்று கூறுகிறார்கள்.

அடுத்த ரவுண்டுக்கு கிளம்பிய சசிகலா: டென்ஷனான எடப்பாடி!

பொதுவாக அரசு ஊழியர்களுக்கு திமுக ஆட்சியில் அதிகளவில் சலுகைகள் கிடைக்கும் என மக்கள் மத்தியில் கூறப்படுவதுண்டு. ஆனால் நிதி நிலைமையை காரணம் காட்டி அகவிலைப்படியே இன்னும் வழங்கப்படாததால் தீபாவளி போனஸ் விஷயத்திலாவது ஸ்டாலின் அரசு ஊழியர்கள் மத்தியில் ஸ்கோர் செய்வாரா என்பதை பொறுத்திருந்து தான் பார்க்க வேண்டும்.