உதயநிதிக்கு டியூஷன் எடுக்கும் அதிகாரிகள்: அமைச்சரவை மாற்றம் எப்போது?

உதயநிதி ஸ்டாலினுக்கு முக்கிய அதிகாரிகள் சிலர் அரசாங்க நடைமுறை குறித்து வகுப்பெடுத்து வருவதாக தகவல்கள் வெளியாகியுள்ளன.

சட்டமன்றத் தேர்தல் நிறைவடைந்த நிலையில் அடுத்து திமுக ஆட்சி தான் என கருத்துக் கணிப்புகள் வெளிவந்த போதே உதயநிதி ஸ்டாலினுக்கு எந்த துறை வழங்கப்படும் என்ற கேள்வி கட்சி நிர்வாகிகள் மத்தியில் எழுந்தன. மு.க.ஸ்டாலின் வகித்த உள்ளாட்சித் துறை வழங்கப்படும் என்றெல்லாம் தகவல்கள் வந்த நிலையில் அமைச்சரவை பட்டியலில் அவர் பெயர் இல்லை.

வாரிசு அரசியல் செய்கிறார் என முதல்வராக பதவியேற்ற உடனே விமர்சனம் செய்வார்கள் என அப்போதைக்கு அந்த முடிவை எடுத்திருந்தார் மு.க.ஸ்டாலின். குடும்பத்துக்குள்ளிருந்தும் அழுத்தங்கள் வந்தபடி இருந்தன. அதைத் தொடர்ந்து அன்பில் மகேஷ், செந்தில் பாலாஜி, கே.என்.நேரு, எ.வ.வேலு என அமைச்சர்களும் வரிசையாக உதயநிதியை அமைச்சராக்க குரல் கொடுக்க தொடங்கினர்.
எடப்பாடிக்கு ஷாக்: அணி மாறும் வேலுமணி- குஷியான சசிகலா
இதற்கிடையே தான் உதயநிதியை அழைத்த ஸ்டாலின் கைவசம் உள்ள திரைப்படங்களின் பணிகளை விரைவில் முடித்துவிட்டு வா என்று கூறினாராம். இதனால் பொள்ளாச்சி பகுதியில் படப்படிப்பு பணிகள் வேகமெடுத்தன.

ஜனவரி, பிப்ரவரியில் எப்படியும் அமைச்சராக பதவியேற்றுவிடுவார் என அவரது ஆதரவாளர்கள் கணக்குப் போட்டுக்கொண்டிருந்த நிலையில் நவம்பர் மாத மழை படப்பிடிப்பை பாதித்தது. இதனால் அந்தப் பணிகள் நிறைவடையவில்லை. அதுமட்டுமல்லாமல் கொரோனா மூன்றாவது அலை வேகமாக பரவிவரும் நிலையில் பாதிப்பிலிருந்து தமிழகம் முழுவதும் மீண்ட பிறகே அமைச்சரவையில் உதயநிதி அடியெடுத்து வைப்பார் என்கிறார்கள் சித்தரஞ்சன் சாலை வட்டாரத்தினர்.

ஆனால் அதற்கு முன் செய்ய வேண்டிய பணிகள் நிறைய இருக்கிறதாம். முக்கியமாக அரசாங்க நடைமுறை, அதன் நுட்பங்கள் குறித்து அதிகாரிகள் சிலர் உதயநிதிக்கு வகுப்பெடுத்து வருகிறார்களாம்.
லேசான மழைக்கு வாய்ப்பு: எந்தெந்த பகுதிகளில் தெரியுமா?
முதன்முறையாக முதல்வராக பதவியேற்ற ஸ்டாலின், அந்தப் பதவியில் பல்லாண்டு அனுபவம் மிக்கவர் போல் முதிர்ச்சியுடன் நடந்துகொள்கிறார் என பாராட்டுகள் வந்தன. அவரை எதிர்ப்பவர்களும் பாராட்டும் அளவுக்கு அவரது கடந்த சில மாத செயல்பாடுகள் அமைந்துள்ளன. அதற்கு முக்கிய காரணம் மேயராக, அமைச்சராக, துணை முதல்வராக நெடிய அனுபவம் கொண்டவர் ஸ்டாலின். அதனால் முதலமைச்சர் எனும் பெரிய பொறுப்பை அவரால் சரியாக கையாளமுடிகிறது.

படப்பிடிப்பு தளத்திலேயே வலம் வந்து கொண்டிருந்த உதயநிதி ஒரு சில ஆண்டுகளாகவே அரசியலில் தலைகாட்டி வருகிறார். இதனால் அவருக்கு அரசாங்க நடைமுறை குறித்த நுட்பங்கள் பயிற்றுவிக்கப்படுகிறதாம். எந்த துறையை உதயநிதிக்கு கொடுப்பது என்று இன்னும் முடிவு செய்யவில்லை என்கிறார்கள். எந்த துறை என்பதைவிட யாரை செயலாளராக போடுவது என்பது தான் முக்கியமாக விவாதிக்கப்படுகிறது என்கிறார்கள்.