ஸ்டாலினை நேரடியாக எதிர்க்கும் அண்ணாமலை?

தேர்தல் நெருங்கும் நிலையில் யார் யார் எந்த தொகுதியில் போட்டியிடலாம் என்ற பேச்சு ஒவ்வொரு கட்சிக்குள்ளும் பலமாக எழுந்துள்ளது.

கட்சிக்கு சாதகமாக உள்ள தொகுதிகள், போட்டியிடும் பிரமுகர்களுக்கு சாதகமாக உள்ள தொகுதிகள், கூட்டணிக் கட்சிகள் பங்குக்கு வராத தொகுதிகள் என கணக்கெடுக்கும் பணி ஒவ்வொரு கட்சியிலும் நடைபெறுகிறது.

அந்த வகையில் பாஜகவில் அண்மையில் இணைந்த அண்ணாமலை எந்த தொகுதியில் போட்டியிடவுள்ளார் என்பது குறித்து முக்கிய தகவல்கள் வெளியாகியுள்ளன.

அமைச்சரின் அண்ணன் மகனை வளைத்த திமுக

ஐபிஎஸ் அதிகாரியாக பணியாற்றிய அண்ணாமலை ஆன்மீக அரசியல் குறித்து பேசிவந்தார். ரஜினிகாந்த் கட்சி ஆரம்பித்தால் இவர்தான் முதல்வர் வேட்பாளர் என்ற பேச்சும் அடிபட்டது. ஆனால் அதற்குள் பாஜகவில் இணைந்தார். கட்சியில் இணைந்த வேகத்தில் அவருக்கு துணைத் தலைவர் பதவியும் வழங்கப்பட்டது.

பாஜக விதியில் பத்து துணைத் தலைவர்கள் மட்டுமே இருக்க வேண்டும் என்ற நிலையில் பதினொன்றாவது துணைத் தலைவராக அண்ணாமலை நியமிக்கப்பட்டார்.

கட்சியில் பல சீனியர் தலைவர்கள் உள்ளபோதும், அண்ணாமலை தொடர்ந்து முன்னிறுத்தப்படுகிறார் என்ற பேச்சும் கட்சிக்குள் உள்ளது.

இந்நிலையில் வரும் சட்டமன்றத் தேர்தலில் திமுக தலைவர் மு.க.ஸ்டாலின் போட்டியிடும் தொகுதியில் அவருக்கு எதிராக அண்ணாமலையை நிறுத்த முடிவு செய்யப்பட்டுள்ளதாக தகவல்கள் வெளியாகிவருகின்றன.

அழகிரி - ஸ்டாலின் சமாதானம்... திமுக மீது திருமா கோபம்... பிண்ணனியில் இருப்பவர் யார்?

ஐபிஎஸ் அதிகாரியாக இருந்தபோது மாணவர்கள் மத்தியில் உரையாற்றி வந்த அண்ணாமலை, சமூக வலைதளங்களிலும் கவனம் பெற்றவர், இதை மட்டுமே தங்களது பலமாகக் கொண்டு தமிழக பாஜக இந்த முடிவை எடுத்துள்ளதாக தெரிகிறது. இது எவ்வாறு செயல் வடிவம் பெறுகிறது என்பதையும், அதற்கு எந்த அளவு வரவேற்பு கிடைக்கும் என்பதையும் பொறுத்திருந்துதான் பார்க்க வேண்டும்.