திமுக தலைமை அதிரடி முடிவு; தேனியில் யாருக்கு அந்த ஜாக்பாட் தெரியுமா?

தற்போது திமுக ஆளுங்கட்சியாக இருப்பதால் கட்சி ரீதியாக பதவிகளை பெற போட்டி பலமாக இருக்கிறது. இதனை உட்கட்சி தேர்தலில் நன்றாக பார்க்க முடிவதாக உடன்பிறப்புகள் கூறுகின்றனர். அதேசமயம் கோஷ்டி மோதல்கள் திமுக தலைமைக்கு நெருக்கடியை ஏற்படுத்தி வருகின்றன. இந்நிலையில் தேனி மாவட்ட திமுகவில் கீழ்மட்ட அளவிலான தேர்தலில் சில சலசலப்புகள் ஏற்பட்டன.

குறிப்பாக வடக்கு மாவட்ட பொறுப்பாளர் தங்க தமிழ்ச்செல்வன், தெற்கு மாவட்ட செயலாளரும், எம்.எல்.ஏவுமான கம்பம் நா.ராமகிருஷ்ணன் ஆகியோரின் அதிகாரம் தலைதூக்கி இருந்ததாக சொல்லப்பட்டது. இத்தகைய விஷயங்கள் நிச்சயம் தலைமையின் காதுகளுக்கு சென்றிருக்கும். எனவே உரிய நடவடிக்கை எடுப்பார்கள் என்று உடன்பிறப்புகள் எதிர்பார்ப்பில் இருக்கின்றனர்.

இந்த சூழலில் புதிய தகவல் ஒன்று தற்போது வெளியாகியுள்ளது. அதாவது அமைப்பு ரீதியாக இரண்டு பிரிக்கப்பட்டு செயல்பட்டு வரும் தேனியை ஒரே மாவட்டமாக மாற்ற கட்சி தலைமை முடிவு செய்திருப்பதாக தகவல்கள் தெரிவிக்கின்றன. அந்த இடத்திற்கு தற்போதைய இரண்டு மாவட்ட பொறுப்பாளர்களையும் தவிர்த்துவிட்டு, புதிதாக ஒருவரை நியமிக்கலாம் என்று ஆலோசிக்கப்பட்டு வருகிறதாம்.

அதன்படி, தற்போது தேனி ஊராட்சி ஒன்றிய சேர்மனாக இருக்கும் சக்கரவர்த்தி மாவட்ட பொறுப்பாளராக நியமிக்கப்பட அதிக வாய்ப்புள்ளதாக தெரிகிறது. இவருக்கு வயது 43. இவர் ஏற்கனவே ஜங்கால்பட்டி கிளை செயலாளராக இருந்துள்ளார். மேலும் ஒன்றிய இளைஞரணி செயலாளர், மாவட்ட இளைஞரணி துணைச் செயலாளர் உள்ளிட்ட பதவிகளை வகித்துள்ளார். தேனி பணிமனையில் அரசு பேருந்து ஓட்டுநராக பணிபுரிந்திருக்கிறார்.

இவரது தந்தை பெயர் மலைச்சாமி. எம்.ஜி.ஆர் அதிமுகவை தொடங்கிய சமயத்தில் தமிழகம் முழுவதும் தேர்தல் பிரச்சார சுற்றுப்பயணம் மேற்கொண்டிருந்தார். அப்போது தேனியில் உள்ள ஜங்கால்பட்டி கிராமத்திற்கு எம்.ஜி.ஆர் வருவதற்கு எதிர்ப்பு தெரிவித்து போராட்டம் நடத்தியவர்களில் முதன்மையானவர் மலைச்சாமி. இதுதொடர்பான வழக்கு நீதிமன்றத்தில் பல ஆண்டுகளாக நடைபெற்று வருவது குறிப்பிடத்தக்கது.

இவர்கள் பாரம்பரியமாக திமுக குடும்பத்தை சேர்ந்தவர்கள். கருணாநிதி, ஸ்டாலின் என திமுக தலைமை மீது தீவிர பற்று கொண்டவர்கள். தேனி திமுகவில் இரண்டு மாவட்ட செயலாளர்களின் செயல்பாடுகள் திருப்தியின்மை காரணமாகவே தலைமை இப்படியொரு நடவடிக்கையை கையில் எடுத்திருப்பதாக பேச்சு அடிபடுகிறது. அடுத்த சில நாட்களில் இதற்கான அதிகாரப்பூர்வ அறிவிப்பு வரலாம் என்று எதிர்பார்க்கப்படுகிறது.