10ஆவது முறை துரைமுருகன் போட்டி சொத்து கோடிகளைக் கடந்தது!

திமுக பொதுச்செயலாளர் துரைமுருகன் வேலூர் காட்பாடி தொகுதியில் 10ஆவது முறையாகப் போட்டியிடுகிறார். அதற்கான வேட்பு மனுத் தாக்கலை மார்ச் 15ஆம் தேதி காட்பாடி தேர்தல் நடத்தும் அலுவலரிடம் வழங்கினார்.

தாக்கல் செய்துள்ள மனுவில் குறிப்பிட்டுள்ள சொத்து விவரங்களின் படி, துரைமுருகன் மற்றும் அவரது மனைவி சாந்தகுமாரி பெயரில் உள்ள அசையும் மற்றும் அசையா சொத்துகளின் ஒட்டு மொத்த மதிப்பு ரூ. 29 கோடியே 62 லட்சம் எனத் தெரியவந்துள்ளது.

துரைமுருகன் பெயரில் உள்ள அசையும் சொத்துகளின் மதிப்பு ரூ. 2 கோடியே 30 லட்சத்து 72 ஆயிரத்து 415. அசையா சொத்துகளின் மதிப்பு ரூ.7 கோடியே 28 லட்சத்து 68 ஆயிரத்து 755. மொத்தம் 9 கோடியே 59 லட்சத்து 41 ஆயிரத்து 170ஆகும்.

கடந்த 2016 ஆம் ஆண்டு துரைமுருகன் பெயரிலிருந்த அசையும் சொத்துகளின் மதிப்பு ரூ. 57 லட்சத்து 8 ஆயிரத்து 425 என அப்போது வேட்பு மனுத் தாக்கல் செய்தபோது குறிப்பிடப்பட்டிருந்தது. அது தற்போது ரூ. 2 கோடியே 30 லட்சத்து 72 ஆயிரத்து 415 ரூபாயாக உயர்ந்துள்ளது.

அமைச்சரை எதிர்த்து களமிறங்கும் அக்கா மகன்... இது ஜோலார்பேட்டை ஜோரு!

துரைமுருகன் மனைவி சாந்தகுமாரி வசம் அசையும் மற்றும் அசையா சொத்தின் மதிப்பு ரூ. 20 கோடியே 2 லட்சத்து 50 ஆயிரத்து 712 ஆகும். கணவன் மனைவி என இருவரின் அசையும் அசையா சொத்து மதிப்பு ரூ. 29 கோடியே 61 லட்சத்து 91 ஆயிரத்து 882 ஆக உள்ளது.

தேர்தலில் போட்டியிடும் வேட்பாளர்கள் தனியாக வங்கிக் கணக்கு தொடங்கிக் கொள்ள வேண்டுமாம். குறிப்பிட்ட வங்கிக் கணக்கிலிருந்துதான் தேர்தல் தொடர்பான செலவுகளைச் செய்ய வேண்டும் எனத் தேர்தல் ஆணையம் உத்தரவிட்டுள்ளது.

இதையடுத்து காட்பாடி இந்தியன் வங்கியில் புதியதாகக் கணக்குத் தொடங்கித் தேர்தல் செலவினங்களுக்காக ரூ. 30 லட்சத்து 74 ஆயிரத்து 622 ரூபாயை துரைமுருகன் டெப்பாசிட் செய்து வைத்துள்ளார்.