முன்னாள் முதல்வர் எம்.ஜி.ஆருக்கு கோயில்; வேலூரில் பூமி பூஜை!

வேலூர் மாவட்டம், காட்பாடி அடுத்த கரசமங்கலம் ஊராட்சிக்கு உட்பட்ட ரகுபதி நகர் பகுதியில் ராமச்சந்திரா சாரிட்டபிள் டிரஸ்ட் மற்றும் எம்ஜிஆர் பக்தர்கள் இணைந்து முன்னாள் முதல்வர் எம்.ஜி.ஆருக்கு கோயில்(MGR Temple) கட்ட முடிவெடுத்தனர்.

அதன் அடிப்படையில், இன்று அப்பகுதியில் 80 சென்ட் நிலத்தில் ஒரு கோடி ரூபாய் மதிப்பீட்டில் கோயில் கட்ட இன்று அடிக்கல் நாட்டப்பட்டது. இதில், அதிமுக மாநில இளைஞரணி துணைச் செயலாளர் முரளி தலைமையில் நடைபெற்ற இந்த விழாவில் நூற்றுக்கணக்கான எம்ஜிஆர் ரசிகர்கள் மற்றும் அதிமுக தொண்டர்கள் கலந்து கொண்டனர். இதில், ஸ்ரீ சக்தி வராஹி குருஜி பூஜை செய்து அடிக்கல் நாட்டினார்.

பின்னர், அதிமுக இளைஞரணி மாநில துணைச்செயலாளர் முரளி பேசியதாவது:-
இந்த கோவிலானது வரும் ஜனவரி மாதத்திற்குள் கட்டி முடிக்கப்படும். இதில் எம்ஜிஆரின் வெங்கலச் சிலை பிரதிஷ்டை செய்யப்படும்.

மேலும், அருகில் ஒரு மண்டபம் கட்டப்பட்டு அதில் அனைவருக்கும் இலவசமாக திருமண நிகழ்ச்சிகளுக்கு வழங்கப்படும். ஜனவரி மாதத்தில் முடிக்கப்படும் இந்த கோவிலை எடப்பாடி பழனிசாமி மற்றும் ஓ.பன்னீர்செல்வம் ஆகியோர் திறந்து வைப்பார்கள் என கூறினார்.