தொப்பையைக் குறைப்பதற்காக முயற்சி செய்து முயற்சி செய்து சோர்வு அடைந்துவிட்டீர்களா? தொப்பையை ஆரோக்கியமான முறையில் அதேசமயம் வேகமாகவும் குறைப்பதற்கு நாம் என்ன செய்ய வேண்டும், என்ன செய்யக் கூடாது, குறிப்பாக மிக விரைவாக தட்டையான வயிறைப் பெறுவது எப்படி என்று இங்கே பார்க்கலாம்.
க்ளீன் டயட்டை பின்பற்றுங்கள்
க்ளீன் டயட் என்பது என்ன என்று முதலில் தெரிந்து கொள்ள வேண்டும். நம்முடைய உடலுக்கு, நம்முடைய உழைப்புக்கேற்ற படி, எவ்வளவு ஊட்டச்சத்துக்களும் கலோரிகளும் தேவையோ அதை மட்டும் ஊட்டச்சத்துக்கள் நிறைந்த உணவுகளின் மூலம் எடுத்துக் கொள்வது தான் க்ளீன் டயட்.
அப்படி இல்லாமல் நாம் எடுத்துக் கொள்ளும் அதிகப்படியான கலோரிகள் இடுப்பைச் சுற்றிலும் வயிற்றுப் பகுதியைச் சுற்றிலும் தேங்கி, கொழுப்பாக மாறி தொப்பையை உண்டாக்குகிறது.
நிறைய பேர் செய்யும் தவறு இதுதான். ஒவ்வொரு வேளை உணவு இடைவேளைக்கும் இடைவெளியில் தேவையற்ற அதிகப்படியான கலோரிகளை எடுத்துக் கொள்கிறார்கள். நொறுக்குத் தீனி எடுத்துக் கொள்வது மட்டும்தான் அதிகப்படியான கலோரி என்று நாம் நினைத்துக் கொண்டிருக்கிறோம். ஆனால் அது அப்படியல்ல,
ஆரோக்கியமான டயட் முறையை பின்பற்றும்போதும் கூட, பழத்திலிருந்து கிடைக்கும் கலோரிகளை விட அவற்றை பழச்சாறாக எடுக்கும்போது கலோரிகள் அதிகரிக்கும். நார்ச்சத்தும் ஊட்டச்சத்தும் குறையும். இப்படி நமக்கே தெரியாமல் அதிக கலோரிகளைக் கொடுத்து விடுகிறோம்.
முழுமையான உணவுகளை அதிகமாக சேருங்கள்
நிறைய உணவுகள் அதிக கலோரிகளைக் கொண்டிருக்கும். ஆனால் போதிய அளவு ஊட்டச்சத்துக்கள் அவற்றில் இருப்பதில்லை. நீங்கள் வேகமாக உங்களுடைய தொப்பையை குறைக்க நினைத்தால் அதற்கு அப்படியே நேர்மாறான முறையில் சாப்பிட வேண்டும். அதாவது குறைந்த கலோரியும் அதிக ஊட்டச்சத்துக்களும் கொண்ட உணவுகளாக எடுத்துக் கொள்ள வேண்டும்.
குறிப்பாக ஃபிரஷ்ஷான பழங்கள், காய்கறிகள், பீன்ஸ் வகைகள் ஆகிய வைட்டமின்கள், மினரல்கள் மற்றும் நார்ச்சத்துக்கள் நிறைந்த முழு உணவுகளை அதிக அளவில் எடுத்துக் கொள்ள வேண்டும்.
அந்தந்த பருவ காலங்களில் கிடைக்கிற ஃபிரஷ்ஷான, வீட்டில் சமைக்கப்பட்ட முழு உணவுகளை எடுத்துக் கொள்வது தான் உடல் எடையையும் கொழுப்பையும் குறைக்கும் உங்களுடைய முயற்சிக்கு சிறந்த பலனைக் கொடுக்கும்.
அதிக நேரம் பசி எடுக்காமல் பசியைக் கட்டுக்குள வைத்து அதேசமயம் உடலுக்குத் தேவையான ஊட்டச்சத்துக்களையும் கொடுக்கிற உணவுகளை தான் எடுத்துக் கொள்ள வேண்டும்.
இப்படி எடுத்துக் கொள்ளும் நார்ச்சத்து நிறைந்த உணவுகளின் மூலம் ஜீரண சக்தியை மேம்படுத்தி மெட்டபாலிசத்தையும் அதிகரிக்கச் செய்ய முடியும். இப்படி உங்களுடைய டயட் முறையை அமைத்துக் கொண்டாலே போதும் உங்களுடைய எடையை, தொப்பையை நீங்கள் திட்டமிட்டபடி குறைத்துவிட முடியும்.
கொழுப்பை கரைக்கும் வொர்க்அவுட்கள்
தொப்பையைக் குறைப்பது என்பது வெறுமனே நூறு க்ரஞ்சஸ் அல்லது சிட்-அப் செய்வதால் மட்டுமே சாத்தியமாகாது.
நீண்ட தூரம் நடைப்பயிற்சி செய்வது, நீண்ட நாட்களாக தொடர்ந்து நடைப்பயிற்சி செய்வதால் எடையைக் குறைப்பது சாத்தியம். வழக்கமாக நடக்கும்போது எடை குறைவது நமக்குப் பெரிதாக தெரியாது. ஆனால் திடீரென ஒரு நாள் நல்ல பலன் கிடைத்திருப்பதை உணர முடியும். ஆனால் உடனடியாக எடை குறைக்க நினைப்பவர்களுக்கு இதுமட்டும் போதுமானதல்ல.
தசைப்பயிற்சிகள் நம்முடைய மெட்டபாலிசத்தை துரிதப்படுத்த உதவும். அதனால் வேகமாக தொப்பையக் குறைக்க வேண்டும் என்று நினைப்பவர்களுக்கு இந்த தசைப்பயிற்சிகள் மற்றும் HIIT பயிற்சிகள் உதவும். ஏனெனில் இந்த உடற்பயிற்சிகள் அனைத்துமே அதிகப்படியான கலோரிகளை எரிக்க உதவுகிறது.