‘திருமணம் என்பது பாலின்பத்துக்கான ஒப்பந்தம் அல்ல’

திருமணம் என்பது பாலின்பத்துக்கான சட்டப்பூர்வமான ஒப்பந்தம் இல்லை என்று டெல்லி நீதிமன்றம் கூறியுள்ளது.

டெல்லியைச் சேர்ந்த நபர் ஒருவர் தனது மனைவியிடமிருந்து விவாகரத்து கோரி குடும்ப நீதிமன்றத்தில் வழக்கு தொடர்ந்திருக்கிறார். 16 ஆண்டுகள் தனது மனைவியுடன் மணவாழ்க்கை நடத்திய அவர், தனது மனைவி தன்னை மிகவும் மோசமாக நடத்துவதாக புகார் கூறியுள்ளார். இத்துடன் தங்களுக்குக் பிறந்த குழந்தைகளையும் வளர்க்கத் தயாராக இல்லை என்றும் தனது மனுவில் தெரிவித்துள்ளார்.

ஆனால், அவரது மனைவி தரப்பில் தனது கணவர் தன்னை மிகவும் கொடூரமான பாலியல் உறவுகளில் ஈடுபட கட்டாயப்படுத்தியதாவும் அதனை மறுத்தபோது தன்னை அடித்துத் துன்புறுத்தியதாவும் கூறப்பட்டது.

இந்த வழக்கில் டெல்லி குடும்ப நீதிமன்ற நீதிபதி தர்மேஷ் சர்மா இன்று தீர்ப்பளித்தார். அப்போது, “சட்டப்பூர்வமான திருமண வாழ்க்கையில் பாலியல் உறவின் பிணைப்பு முக்கியமான அங்கம் வகிக்கிறது.” என்ற அவர், “திருமணம் என்பது பாலின்பம் துய்ப்பதற்கான சட்டப்பூர்வமான ஒப்பந்தம் இல்லை” என்றும் கூறினார். இத்துடன் விவாகரத்து கோரிய வழக்கையும் தள்ளுபடி செய்து உத்தரவிட்டார்.