உளவியல் சார்ந்த நம்பிக்கைகள்
தொப்பையைக் குறைக்கவும் கார்போஹைட்ரேட் அதிகமாக சாப்பிடுவதைக் கட்டுப்படுத்துவது ஆகியவற்றின் மூலம் கூடுதலாக இருக்கும் உடல் எடையைக் குறைக்க முடியும்.
இவை எதுவும் இன்றி, சில நம்பிக்கைகளைப் பின்பற்றுவதன் மூலம் எடையைக் குறைக்க முடியும் என்று உளவியல் ரீதியாக நம்ப வைக்கப்பட்டு அவற்றை பின்பற்றவும் செய்கிறார்கள்.
உளவியல் ரீதியாக ஒரு விஷயம் நம்பப்படும்போது அது உண்மையாகும் சாத்தியமும் இருப்பதாக மக்கள் நம்புகின்றனர். அப்படி கடைபிடிக்கும் சில விநோத செயல்கள் இதோ...
மெழுகுவர்த்தி ஏற்றுதல் எடையை குறைக்கும்
தினமும் இரவு சாப்பிட்டு முடித்ததும் டேபிளில் வெனிலா பிளேவர் செண்ட் கொண்ட மெழுகுவர்த்தியை ஏற்றி வைத்தால் எடை குறையுமாம்... இதென்ன புது கதை என்று நினைக்காதீர்கள். அதற்கும் ஒரு காரணம் சொல்கிறார்கள்.
வெனீலா செண்ட் பிளேவர் கொண்ட மெழுகுவர்த்தி ஏற்றுவதன் மூலம் உணவுக்குப் பின் டெசர்ட் (இனிப்புகள்) சாப்பிட வேண்டும் என்ற எண்ணம் குறையுமாம். ஒருவேளை அந்த மாதிரி மெழுகுவர்த்தி எதுவும் உங்களிடம் இல்லையென்றால் வெனீலா வாசனை வருகிற எந்த பொருளையும் பயன்படுத்தலாம். அந்த வாசனையை நுகருவதன் மூலம் எடையைக் கட்டுக்குள் வைக்க முடியும் என்கிறார்கள்.
இப்படி மேற்கொள்ளப்பட்ட ஆய்வு ஒன்றில், வெனீலா வாசனையை நுகருவதன் மூலம் சராசரியாக 4.5 பவுண்ட் அளவு எடை குறைந்ததாம். கிச்சன் மற்றும் டைனிங் டேபிள் ஏரியாக்களில் வெனீலா வாசனை வீசும்படி ஸ்பிரே அல்லது ஏதாவது செண்ட் பயன்படுத்துங்கள். அது உங்களுடைய மனதையும் லேசாக்கி, அதிகமாக சாப்பிட வேண்டும் என்ற எண்ணத்தையும் தடுக்கும்.
நீல நிற தட்டில் சாப்பிடுவது எடையை குறைக்கும்
நீல நிற தட்டில் சாப்பிடுவதால் உடல் எடை குறையும் என்று கூறப்படுகிறது. நீல நிறம் நம்முடைய உணவு ஆர்வத்தைக் கட்டுப்படுத்துமாம்.
பொதுவாக இயற்கையாக விளையும் காய்கறிகளில் இந்த முழுமையான நீல நிறத்தில் அமைந்த உணவுப் பொருள்கள் மிக மிகக் குறைவு. குறிப்பாக காய்கறிகள் மற்றும் பழங்களில் பெரிதும் இந்த நிறத்தில் இருப்பதில்லை.
வண்ணங்கள் மீதான ஈர்ப்பு காரணமாக மரபணு மாற்றங்களால் சில காய்கறிகளில் நிறங்கள் மாற்றப்பட்டிருக்கின்றனவே ஒழிய இயற்கையாக இந்த நீல நிறத்தில் விளைவது மிக மிக அரிது. இல்லை என்று கூட சொல்லலாம்.
அதேசமயம் மஞ்சள் மற்றும் சிவப்பு நிற உணவுகள் நம்முடைய பசியையையும் சாப்பிடும் ஆர்வத்தையும் அதிகமாகத் தூண்டுமாம். அதனால் தான் ஃபாஸ்ட் ஃபுட் கடைகள் மற்றும் ரெஸ்ட்டாரண்ட்டுகளில் மஞ்சள், சிவப்பு, ஆரஞ்சு நிற இன்டீரியர் டிசைன்கள் செய்யப்பட்டிருக்கின்றன.
அதனால் எடையைக் குறைக்க வேண்டும் என்று நினைத்தால் இனி நீல நிற தட்டில் சாப்பிடுங்கள்.
கண்ணாடி முன் அமர்ந்து சாப்பிடுதல்
கண்ணாடிக்கு முன்பாக உட்கார்ந்து கொண்டு சாப்பிட்டால் உடல் எடை குறையுமாம். ஏனெனில் கண்ணாடி முன் அதை பார்த்துக் கொண்டே சாப்பிடும்போது நம்முடைய உடலின் அதிகப்படியான எடையும் அதை குறைக்க வேண்டுமென்ற நினைவும் வந்து கொண்டே இருக்கும். அதனால் அதிக கலோரிகள் எடுத்துக் கொள்ளாமல் சுயக் கட்டுப்பாட்டுடன் இருக்க வேண்டும்.
ஒரு ஆய்வில், இப்படி கண்ணாடி முன் அமர்ந்து சாப்பிடுவதை வழக்கமாகக் கொண்டவர்களில் மூன்றில் ஒருவர் தாங்கள் எடுத்துக் கொள்ளும் உணவின் அளவில் கவனம் செலுத்தியதாகவும் அது அவர்களுக்கு அதிக கலோரிகள் எடுத்துக் கொள்ளாமல் இருக்க உதவியதாகவும் குறிப்பிடுகிறார்கள்.
சுயிங்கம் சாப்பிட்டால் எடை குறையும்
வாயில் அடிக்கடி சுயிங்கத்தை போட்டு மென்று கொண்டு இருந்தால் அது உடல் எடையைக் குறைக்க உதவி செய்யுமாம்.
அடிக்கடி வாயில் சுயிங்கம் மெல்லும்போது ஏதோ சாப்பிடுகிற உணர்வு மன ரீதியான திருப்தியை ஏற்படுத்தும். அதனால் அதிக கலோரிகள் எடுத்துக் கொள்ளாமல் பார்த்துக் கொள்ளும்.
சிப்ஸ், ஐஸ் க்ரீம், சாக்லெட் என சாப்பிடுவதற்கு பதிலாக சுயிங்கத்தை மெல்லுவது சிறந்தது. அது நம்முடைய விருப்ப உணவுகளை அதிகமாக சாப்பிட விடாமல் மனதை மாற்ற உதவும்.
சுயிங்கம் கொஞ்சம் இனிப்பாக இருப்பதால் நம்முடைய நாக்கின் சுவை மொட்டுகளும் திருப்தியடையும்.