தக்காளி நம்முடைய தினசரி உணவில் தவிர்க்க முடியாத பழம். ஆனால் நிறைய கட்டுக் கதைகளும் தக்காளியைச் சுற்றி இருக்கத்தான் செய்கின்றன. சிலர் தக்காளியை சமைக்காமல் வெறுமனே சாப்பிடுவார்கள். ஜூஸாகக் குடிப்பார்கள். ஆனால் சிலரோ தக்காளி அதிகமாகச் சாப்பிட்டால் சிறுநீரகக் கற்கள் பிரச்சினை உண்டாகும் என்று சொல்லுவார்கள். அதேபோல தான் நீரிழிவு நோயாளிகள் தக்காளியை அதிகமாக உணவில் சேர்த்துக் கொள்ளலாமா, கூடாதா என்ற கேள்வி இருந்து கொண்டே இருக்கிறது.
நீரிழிவு நோய்
நீரிழிவு நோய் என்பது மற்ற நோய்களைப் போல திடீரென ஒருநாள் முளைத்து வந்துவிடுவதல்ல.
அது நீண்ட காலமாக நாம் கடைபிடித்து வந்த ஆரோக்கியமற்ற உணவுப் பழக்கத்தின் விளைவு.
நீண்ட காலமாக ரத்த சர்க்கரை அளவை முறையாக நிர்வகிக்காததன் விளைவே நீரிழிவு நோய் உண்டாகக் காரணம்.
அதை நிர்வகிப்பதற்கு மருந்துகள் சாப்பிட்டாலும் உணவுமுறையால் மட்டுமே கட்டுக்குள் கொண்டு வர முடியும்.
தக்காளி
தக்காளியில் மிக அதிக அளவில் ஆன்டி - ஆக்சிடண்ட்டுகள் நிறைந்திருக்கின்றன. அதேபோல் தக்காளியில் லைகோபின் என்னும் வேதிப்பொருள் அதிகமாக இருக்கிறது.
இது நம்முடைய உடல் திசுக்களில் உள்ள கரோட்டினாய்டுகள் உற்பத்தியில் மிக முக்கியப் பங்கு வகிக்கிறது.
அதைவிட தக்காளியில் மிகக்குறைந்த அளவு கிளைசெமிக் குறியீடு கொண்டது. அதனால் நீரிழிவு நோயாளிகள் சாப்பிட ஏற்றதாக இருக்கிறது.
குறைந்த கார்போ
தக்காளி குறைந்த கார்போ அளவு கொண்ட பழங்களில் ஒன்று. அதனால் தக்காளியை உடல் எடையைக் குறைக்க நினைப்பவர்களும் கூட டயட்டில் சேர்த்துக் கொள்ளலாம்.
தக்காளியில் வைட்டமின்கள், பொட்டாசியம், பீட்டா கரோட்டீன், பிளவனாய்டுகள், ஃபோலேட் ஆகிய சத்துக்கள் நிரம்பியிருப்பதால் டைப் 2 நீரிழிவைக் கட்டுக்குள் வைக்கும் தன்மையைக் கொண்டிருக்கிறது.
தினமும் பச்சையாக ஒரு கப் அளவுக்கு தக்காளி சாப்பிட்டு வர உயர் ரத்த அழுத்தமும் குறையும்.
நோயெதிர்ப்பு சக்தி
தக்காளியில் வைட்டமின் நிறைந்திருக்கின்றன. குறிப்பாக அதிலுள்ள வைட்டமின் சி நோயெதிர்ப்பு மண்டலத்தை வலுப்படுத்த உதவுகிறது.
அதனால் நோய்த் தொற்றுக்கள் ஏற்படாமல் தடுப்பதோடு, நீரிழிவு பிரச்சினை உள்ளவர்களுக்கு அடிக்கடி புண் ஏற்படுவதும் அது ஆறாமல் கஷ்டப்படுவதும் தடுக்கப்படும்.
எடையைக் குறைக்க
தக்காளி மிகக் குறைந்த கலோரி அளவு கொண்டிருப்பதால் எடையைக் குறைக்க உதவுகிறது.
எடையைக் கட்டுக்குள் வைத்திருந்தாலே அதிக கலோரிகள் எடுத்துக் கொள்வதும் குறையும். இதனால் ரத்த சர்க்கரை அளவும் கட்டுக்குள் இருக்கும்.
ஹீமோகுளோபின் அதிகரிக்க
தக்காளியில் அதிக அளவில் பொட்டாசியம் மற்றும் ஃபோலேட்டுகள் நிரம்பியிருக்கின்றன. இவை ரத்த நாளங்களை விரிவுபடுத்தும் தன்மை கொண்டவை. இதனால் உடலில் ரத்த ஓட்டம் சீராக இருக்கும். ரத்த அணுக்களின் உற்பத்தியும் அதிகரிக்கும்.
இதய நோய்கள்
நீரிழிவு பிரச்சினைகள் உள்ளவர்களுக்கு உயர் ரத்த அழுத்தம், மாரடைப்பு, பக்கவாதம் போன்ற பல பக்க நோய்கள் ஏற்படும் வாய்ப்புகள் அதிகம்.
தினசரி உணவில் தக்காளி சேர்த்துக் கொள்ளப்படும்போது இந்த பிரச்சினை வெகுவாகக் குறைகிறது. தக்காளியில் உள்ள லைகோபின் எனும் தனிமம் மாரடைப்பு ஏற்படாமல் தடுக்க உதவுகிறது.