உடலுறவின்போது அதிக வலி ஏற்படுவது எதனால்? அதனால் பின்விளைவுகள் உண்டாகுமா?

வலிமிகுந்த உடலுறவான டிஸ்பாரூனியாவின் அறிகுறிகள் பற்றி மகப்பேறு மருத்துவர்கள் கூறுகையில், உடலுறவின் துவக்க நிலையில் வலி ஏற்படுவது, ஒவ்வொரு முறை ஊடுருவலின் போதும் வலிப்பது போன்ற உணர்வு, உடலுறவுக்குப் பின்னும் பிறப்புறுப்பு அல்லது யோனிப் பகுதியில் பல மணி நேரம் வலி இருப்பது போன்ற அறிகுறிகள் இருக்கும்.

பெரும்பாலான பெண்களுக்கு உடலுறவின் துவக்கத்தில் வலி ஏற்படுவது பொதுவான விஷயமாகும். இது போதுமான உயவு இல்லாததால் ஏற்படும். பின் சிறிது நேரத்தில் அந்த வலி குறைந்து விடும். ஆனால், தொடர் வலி இருப்பதற்கு டிஸ்பாரூனியா தான் காரணம். அதுமட்டுமின்றி, பிறப்புறுப்பில் காயம், எரிச்சல், வீக்கம், தொற்று அல்லது தோல் கோளாறும் கூட வலிக்கு காரணமாக அமையும்.

அதேபோல் உடலுறவின் போது பிறப்புறுப்பு பகுதி மட்டுமின்றி, வயிற்றுப் பகுதியில் நீங்கள் வலியை அனுபவிக்கிறீர்கள் எனில் அதற்குப் பல காரணங்கள் உள்ளன. அதாவது உங்களின் இடுப்புப் பகுதி மற்றும் வயிற்றுப் பகுதியில் ஏற்படும் வலிக்கு எண்டோ மெட்ரியோசிஸ், இடுப்பு அழற்சி நோய், கருப்பை இறக்கம் அல்லது பின்னோக்கிச் செல்லப்பட்ட கருப்பை, கருப்பை நார்த் திசுக்கட்டிகள், கருப்பை நீர்க்கட்டிகள், குடல் நோய், மூல நோய் போன்ற சில நோய்கள் கூட காரணமாக இருக்கும். இதுமட்டுமின்றி ஏற்கனவே வயிறு மற்றும் இடுப்பு பகுதியில் அறுவை சிகிச்சை செய்திருந்தால் அது கூட காரணமாக இருக்கும்.

சில நேரங்களில் உடலுறவின் போது வலி ஏற்படுவதற்கு உடல் மட்டுமின்றி, உணர்ச்சி சம்மந்தப்பட்ட காரணிகள் கூட காரணமாக அமையும். அதாவது, கவலை, மனச்சோர்வு, உடல் தோற்றத்தைப் பற்றிய கவலை, உடலுறவு நெருக்கம் குறித்த பயம் போன்றவை கூட வலி மிகுந்த உடலுறவுக்கு காரணமாக அமையும். அதேபோல் மன அழுத்தமும் உங்களின் உடலுறவில் வலியை ஏற்படுத்தும் மிக முக்கிய காரணமாகும். ஏனெனில், மன அழுத்தம் இருந்தால் அது, இடுப்பு மற்றும் பிறப்புறுப்பு பகுதி தசைகள் இறுகச் செய்யும். அதனால் கூட உறவின் போது வலி ஏற்படும். சிலருக்கு சிறு வயதிலோ அல்லது திருமணத்துக்கு முன்போ ஏற்படும் பாலியல் துஷ்பிரயோகம் கூட உடலுறவின் போது வலி ஏற்படுவதற்கு காரணமாக அமையும் வாய்ப்புள்ளது.

உங்களுக்கு உடலுறவின் போது வலி ஏற்பட்டால் அதற்குரிய மருத்துவரை அணுகி, ஏன் வலி ஏற்படுகிறது என்பதற்கான காரணத்தை அடையாளம் காண வேண்டும். அதுமட்டுமின்றி உங்களின் இடுப்பு மற்றும் பிறப்புறுப்பு தசைகளை இலகச் செய்யும் பயிற்சிகளையும் உங்கள் மருத்துவரின் அனுமதியுடன் மேற்கொள்ள வேண்டும். அதோடு மன அழுத்தம் ஏற்படுவது போன்றவற்றில் இருந்து விலகி இருத்தல் அவசியம். அதுமட்டுமின்றி, உடலுறுவு குறித்த பயம் அல்லது குழப்பம் இருந்தால் அதனையும் உங்கள் மருத்துவரிடம் கேட்டு தீர்த்துக் கொள்வது நல்லது.