நீரிழிவு
இரத்தத்தில் சர்க்கரை அளவு அதிகரிப்பதே நீரிழிவு என அழைக்கப்படுகிறது. ஒரு முறை அதிகரிக்கும் இரத்த சர்க்கரையை மீண்டும் குறைப்பது கடினமாகிறது. மாறி வரும் உணவு கலாச்சாரங்களால் நீரிழிவு ஒரு சர்வதேச பிரச்சனையாக மாறியுள்ளது. நீரிழிவை கட்டுப்படுத்த மருத்துவர்கள் மருந்துகளைப் பரிந்துரைக்கின்றனர். இந்த மருந்துகள் நீரிழிவை கட்டுப்படுத்த உதவுகிறது என்றாலும் சில பக்க விளைவுகளைக் கொண்டுள்ளன.
நீரிழிவு நோயாளிகளுக்கு இரத்த சர்க்கரை அளவு அதிகரிப்பதால் பல்வேறு உடல் உபாதைகள் ஏற்படுகின்றன. இது அவர்களுக்கு மனதில் சோர்வை ஏற்படுத்துகிறது. அதில் முக்கியமான ஒன்று வயிற்று வலி. நீரிழிவு காரணமாகக் குடலில் ஏற்படும் சில மாற்றங்களால் நீரிழிவு நோயாளிகள் வயிற்று வலியை அனுபவிக்கின்றனர். சிலருக்கு மோசமான வயிற்று வலியும் ஏற்படுகிறது. இதனால் அவர்கள் பெரும் துயருக்கு ஆளாகின்றனர். எதனால் இந்த நீரிழிவு வயிற்று வலி ஏற்படுகிறது. அதை சரி செய்ய என்ன செய்யலாம் என்பதை இப்போது விவரமாகப் பார்க்கலாம்.
நீரிழிவு வயிற்று வலி
உங்களுக்கு நீரிழிவு நோய் ஏற்பட்டுவிட்டது என்று தெரிந்தால் அதன் பிறகு மிகவும் விழிப்புணர்வுடன் இருக்க வேண்டும். இதனால் உங்கள் வாழ்க்கை முறையில் பல மாற்றங்களை நீங்கள் ஏற்படுத்த வேண்டியிருக்கும். அதில் முதலாவது உணவு மாற்றம், முன்பே சொன்னது போல நீரிழிவு நோய்க்கும் உணவிற்கும் முக்கிய தொடர்புண்டு.
எனவே நார்ச்சத்து அதிகம் கொண்ட பழங்கள், பீன்ஸ் மற்றும் காய்கறிகள் போன்ற உணவுகளை அடிக்கடி எடுத்துக்கொள்ள வேண்டும். இந்த உணவுகள் குறைவான அளவில் கலோரிகளையும் அதிகமான அளவில் நார்ச்சத்துக்களையும் கொண்டுள்ளது. இதனால் உடலில் தேவை இல்லாமல் கொழுப்பு சேர்வதை இது தடுக்கிறது.
ஆனால் அதிகமான நார்ச்சத்தை எடுத்துக்கொள்வது வயிற்றில் வாயு பிரச்சனையை ஏற்படுத்தும். இதனால் உங்களுக்கு வயிற்று வலி ஏற்படலாம். எனவே நார்ச்சத்து உட்கொள்ளலை திடீரென அதிகரிப்பது உங்களுக்குப் பிரச்சனையை ஏற்படுத்தலாம், நார்ச்சத்து உள்ள உணவுகளைப் படிபடியாக அதிகரிப்பது இந்த வாயு பிரச்சனை ஏற்படாமல் தடுக்க உதவும் முறையாகும். மேலும் பருப்பு வகைகளை ஊற வைக்கும்போது அதன் நீரை கீழே ஊற்றி விடுங்கள். அந்த நீரை சமையலுக்கு பயன்படுத்துவது வாயு பிரச்சனையை ஏற்படுத்தலாம்.
பெண்கள் எடையைக் குறைக்க 7 நாளுக்கான உணவுத்திட்டம் இதோ... ட்ரை பண்ணி பாருங்க...
குளுக்கோஸ் அளவை குறைக்கும் மருந்துகள்
டைப் 2 வகை நீரிழிவு உள்ளவர்களுக்கு இரத்த சர்க்கரை அளவை குறைப்பது கடினமான காரியமாக உள்ளது. இதனால் அவர்களுக்கு இரத்த குளுக்கோஸ் அளவை குறைக்க சில மாத்திரைகள் மற்றும் மருந்துகள் மருத்துவர்களால் பரிந்துரைக்கப்படுகின்றன. இவை இரத்த சர்க்கரை அளவை குறைப்பதில் பயனுள்ளதாக இருக்கிறது என்றாலும் இவற்றால் குடலில் பிரச்சனை ஏற்படலாம்.
இந்த மருந்துகள் சில நோயாளிகளுக்கு வயிற்று வலியை ஏற்படுத்தலாம். எனவே இந்த மாதிரியான மருந்துகளை எடுத்துக்கொள்பவர்கள் எடுத்த உடனே மருந்துகளை அதிக டோஸ்கள் எடுத்துக்கொள்ள வேண்டாம். மருந்தின் அளவை கொஞ்சம் கொஞ்சமாக அதிகரிக்கலாம் என மருத்துவர்கள் பரிந்துரைக்கின்றனர்.
மெட்ஃபோர்மின்
மெட்ஃபோர்மின் என்பது டைப் 2 வகை நீரிழிவு உள்ளவர்களுக்கு ஆரம்ப கட்டத்தில் கொடுக்கப்படும் மருந்து ஆகும். ஆனால் இது சில சமயம் பக்கவிளைவுகளை ஏற்படுத்துகிறது. இது சிலருக்கு நெஞ்செரிச்சல், குமட்டல் அல்லது வயிற்றுப்போக்கு போன்ற பிரச்சனைகள் ஏற்படுகிறது.
இந்த மருந்தைப் பயன்படுத்துபவர்களில் 5 முதல் 10 சதவீதம் பேர் வயிற்று போக்கு, வயிற்றுவலி அல்லது வயிற்றில் அசெளகரியம் போன்ற பிரச்சனைகளுக்கு ஆளாகின்றனர். எனவே இந்த மருந்தைத் தேவைக்கேற்ப குறைவான அளவில் பயன்படுத்தவும்.
ஊசி மருந்துகள்
இவ்வளவு நேரம் வாய் வழியாக எடுத்துக்கொள்ளும் மருந்துகளால் ஏற்படும் பக்க விளைவுகளைப் பார்த்தோம். ஆனால் சில ஊசிகளும் கூட நீரிழிவு நோயாளிகளுக்கு வயிற்று வலி ஏற்படுவதற்கு காரணமாக உள்ளன. நீரிழிவு நோயாளிகளுக்குப் போடப்படும் ஜி.எல்.பி – 1 அகோனிஸ்டு பைட்டா மற்றும் விக்டோசா ஊசியானது குமட்டல் மற்றும் வாந்தியை ஏற்படுத்துகிறது.
ஆனால் இந்தப் பக்க விளைவானது நாம் பயன்படுத்தும் டோஸ் அளவை பொறுத்து மாறுபடும் எனக் கூறப்படுகிறது. இது செரிமான சக்தியை மெதுவாக்க கூடிய ஊசியாக உள்ளது. இதனால் நீரிழிவு நோயாளிகளுக்கு அடிக்கடி பசி எடுக்கும் பிரச்சனை சரி செய்யப்படுகிறது. ஆனால் இந்த ஊசியை புதிதாகப் போட்டுக்கொள்பவர்கள் வயிறு தொடர்பான பிரச்சனைகளுக்கு ஆளாகின்றனர்.
உயர் இரத்த சர்க்கரை மற்றும் குறைந்த இரத்த சர்க்கரை
உலகில் பெரும்பாலான மக்களுக்கு இரத்த சர்க்கரை அளவு உயர்வதால் உபாதைகள் ஏற்படுகின்றன. ஆனால் சிலருக்கு இரத்த சர்க்கரை அளவு குறைவாக உள்ளது. குறைவாக இரத்த சர்க்கரை இருப்பது நல்ல விஷயம்தானே என பலர் நினைக்கலாம். நமது உடலில் இரத்த சர்க்கரையின் அளவானது சரியான அளவில் இருக்க வேண்டும்.
அது அதிகமாகவோ அல்லது குறைவாகவோ இருப்பது உடலுக்குத் தீங்கு விளைவிக்கும். சில சமயங்களில் குறைவாக இரத்த சர்க்கரை கொண்டவர்களும் வயிற்று வலி பிரச்சனையை சந்திக்கின்றனர்.
எனவே நீரிழிவு நோயாளிகளுக்கு வயிற்று வலி ஏற்படுவதற்கு பல வகையான காரணங்கள் உள்ளன. சிறியதாக ஏற்படும் வயிறு கோளாறுகள் சில மணி நேரங்களில் சரியாகிவிடுகின்றன. ஆனால் உங்களுக்குத் தொடர்ந்து வயிற்றுப்போக்கு, வயிற்று வலி அல்லது வயிறு சார்ந்த பிரச்சனைகள் ஏற்பட்டால் நீங்கள் மருத்துவரை அணுகுவது நல்லது.