நீரிழிவைக் கட்டுப்படுத்தும் உணவுகள்

இன்று பலருக்கு நீரிழிவு நோய் தாக்குகிறது. மாறிவரும் உணவுப்பழக்கம், துரித உணவு கலாசாரம் ஆகியவற்றால் சிறு வயதிலேயே நீரிழிவு, ரத்த அழுத்தம் உண்டாகிறது. 35 வயதுக்கு மேல் அனைவரும் சர்க்கரை அளவை பரிசோதித்துக் கொள்ளவேண்டும் என்கின்றனர் மருத்துவர்கள். நீரிழிவு தாக்கினால் சர்க்கரை அளவை கட்டுக்குள் வைக்க எந்தெந்த உணவுகளை உட்கொள்ளவேண்டும் எனப் பார்ப்போம்.

பாகற்காய்

நீரிழிவுக்கு சிறந்த நிவாரணி பாகற்காய். இன்சுலின் சுரப்பைத் தூண்டுகிறது. செல்கள், குளுகோஸ் உறிஞ்சுவதை அதிகப்படுத்துகிறது. குடலிலிருந்து சேமிப்பாக இருக்கும் க்ளுகோஸ் உறிஞ்சப்படுவதைக் குறைக்கிறது.

மஞ்சள்

உடலில் வீக்கத்தைக் கட்டுப்படுத்தும். வீக்கமும் நீரிழிவு நோயும் ஒன்றுடன் ஒன்று தொடர்புடையன என்பதாலும் நீரிழிவு நோயைப்பற்றிய ஆய்வுகளில் மஞ்சள் அதிகம் இடம் பிடிக்கிறது. உடல் எடையைக்குறைப்பதிலும், கொழுப்புச்சத்தைக்குறைப்பதிலும் முக்கியப்பங்காற்றுகிறது.

பட்டை

கார்போஹைட்ரேட் அதிகம் உள்ள உணவில் பட்டையைச்சேர்த்துவதால் உணவுக்குப்பின் ரத்தத்தில் க்ளுகோஸ் அளவு அதிகமாகாமல் பார்த்துக் கொள்கிறது. காரமான சுவை உடையது. ஆகவே கபத்தை சமப்படுத்துகிறது. இன்சுலினை பலவிதங்களில் பயன்படுத்த தக்க விதத்தில் செயல்படுத்துகிறது. உடலின் திறனை மேம்படுத்துகிறது. எனவேதான் இதனை பிரியாணி போன்ற மசாலா உணவுகளில் சேர்ப்பார்கள்.

பாதாம்

பட் டையைப் போலவே பாதாமும் கார்போ ஹைட்ரேட் அதிகம் உள்ள உணவில் சேர்க்கும் போது இரத்தத்தில் க்ளுகோஸ் அளவைக் குறைக்கும். ஆனால் இதனை அளவாக சாப்பிடுவது நல்லது.

வல்லாரை

வல்லாரையை சமைக்காமல் பச்சையாகத் தொடர்ந்து சாப்பிட்டால் சர்க்கரை அளவு குறையும். இந்த வகை கீரையில் உள்ள நார்ச்சத்து சர்க்கரை அளவை கட்டுப்படுத்தும்.

ஏலக்காய்

சர்க்கரை அளவு குறையும், இரவு படுக்கும் போது 2 கிராம் காட்டு ஏலத்தைப் பசும்பாலில் கலந்து 3 மாதம் சாப்பிட்டு, பிறகு சோதித்துப்பார்த்தால் சர்க்கரை குறைந்திருக்கும்.

சிறுகுறிஞ்சான்

இதை சர்க்கரைக்கொல்லி என்பர். இலையை அப்படியே மென்று சாப்பிடலாம். அல்லது பொடியாக்கிச் சாப்பிடலாம். தேநீராக்கிக் குடிக்கலாம். 2000 வருடங்களுக்கும் மேலாக இது பயன்பாட்டில் இருந்து வந்துள்ளது. இரத்தத்தில் சர்க்கரை அளவைக்குறைக்கிறது. இன்சுலின் சுரக்கும் இடமான கணையத்தைப் பாதுகாக்கிறது. திசுக்களைத் தூண்டி, க்ளுகோஸை உறிஞ்ச உதவுகிறது.

வெந்தயம்

இதை சமையலில் பலவிதங்களில் பயன்படுத்துவார்கள். அத்துடன் பொடியாகச்செய்து தனியாகவோ, மோருடன் சேர்த்தோ சாப்பிடலாம். தேநீராக்கிக்குடிக்கலாம். இதில் அதிக நார்ச்சத்தும் இருக்கிறது. க்ளுகோஸ் அளவைக்குறைக்கும் பல்வேறு காரணிகள் வெந்தயத்தில் இருப்பது கண்டறியப்பட்டுள்ளது. தினமும் வெந்தயம் சாப்பிடுவதால் ரத்தத்தில் க்ளுகோஸ் அளவைக் கட்டுப்படுத்துகிறது. இன்சுலின் எதிர்ப்பைக் குறைக்கிறது.