பிட்டப்பகுதியில் ஏற்படும் பருக்கள்
பிட்டப்பகுதியில் உண்டாகும் பருக்களை மருத்துவ ரீதியாக ஃபோலிகுலிடிஸ் என்னும் பெயரில் அழைப்பார்கள். இந்த பருக்கள் சில சருமத் தொற்றுக்களின் காரணமாக உண்டாகிறது.
புட்டத்தில் பருக்கள் ஏற்படுவது அசௌகரியத்தையும் எரிச்சலையும் கொடுக்கும். இந்த வகை பருக்கள் இந்த பகுதியில் உள்ள முடியின் வேர்க்கால்கள் உள்ள துளையில் உண்டாகும் ஈரப்பதம் அதனால் ஏற்படும் பாக்டீரியா மற்றும் பூஞ்சை தொற்றுக்களால் உண்டாவதாக மருத்துவர்கள் குறிப்பிடுகிறார்கள்.
பிட்டப்பகுதியில் பருக்கள் உண்டாகக் காரணங்கள்
பிட்டப்பகுதியில் பருக்கள் உண்டாவதற்கு பல்வேறு காரணங்கள் இருக்கின்றன. அவற்றில் முக்கியமான சில அறிகுறிகள் இதோ...
1. ஈரமான உள்ளாடைகள் அணிதல்
நம்மில் பெரும்பாலானோர் செய்யும் தவறு இது. குளித்துவிட்டு வந்ததும் ஈரமாக இருக்கும்போதே உள்ளாடைகளை அணிந்து கொள்வது. இதனால் நீண்ட நேரம் ஈரமாக இருப்பதால் மிக எளிதாக பூஞ்சைத் தொற்றுக்கள் உண்டாகும்.
அதேபோல அதிகப்படியான வியர்வை உண்டாகும்போது அதனால் அந்தரங்கப் பகுதியும் உள்ளாடையும் அதிக ஈரப்பதத்துடன் இருக்கும். இதன் காரணமாகவும் பாக்டீரியா மற்றும் பூஞ்சை தொற்றுக்கள் ஏற்பட்டு அதன் காரணமாக பருக்களும் வலி நிறைந்த பருக்களும் கட்டிகளும் உண்டாகின்றன.
ஏனெனில் அதிகப்படியான ஈரத்தன்மையுடன் இருப்பதால் பாக்டீரியா மற்றும் நுண்ணுயிரிகள் உற்பத்தியாவதோடு அவற்றின் இனப்பெருக்கத்தையும் தூண்டுகிறது.
கொப்புளங்கள் உண்டாவது
பருக்கள் தோலின் உட்பகுதியில் சீபம் சுரப்பால் தோன்றி, அது உள்ளுக்குள்ளே இருந்து பெரிதாகத் தொடங்கும். அப்படி பெரிதாகும் போது வலி மிகுந்த கொப்புளங்களாக தோலின் மேல் புறத்தை நோக்கி வெளியேறும்.
இதுபோன்ற சமயங்களில் உடைகளால் அழுத்தப்படுவது, அந்த இடத்துக்கு அதிக அழுத்தம் கொடுத்து உட்காருவது, கைகளால் தொடும்போது அந்த கொப்புளங்களில் உள்ள சீபம் வெளியேறி மற்ற இடங்களுக்கு பரவுவதால் பருக்கள் அதிகமாகப் பரவ ஆரம்பிக்கும். இதனால் புட்டப்பகுதியில் வீக்கமும் வலியும் உண்டாகலாம்.
ஒரே இடத்தில் அமர்ந்திருத்தல்
புட்டப்பகுதியில் ஏற்படும் ஃபோலிகுலிடிஸ் என்னும் நுண்ணுயிரிகளால் ஏற்படும் தொற்றானது பல மணி நேரம் வரையிலும் ஒரே இடத்தில் உட்கார்ந்திருப்பதன் காரணமாகவும் ஏற்படுகிறது.
நாள் கணக்கில் ஒரே இடத்தில் குறிப்பாக அலுவலகங்களில் வேலை பார்ப்பவர்கள் ஃபைபர் சேர்களில் அதிக நேரம் உட்காரும்போது உடல் சூடும் அதிகரிக்கிறது. மேலும் அதிகப்படியான உராய்வு மற்றும் எரிச்சலை ஏற்படுத்துகிறது.
இதன் விளைவாக ஃபோலிகுலிடிஸ் ஏற்படுகிறது. ஒருவேளை நாள் முழுக்க உட்கார்ந்து வேலை செய்யும் கட்டாயம் இருக்கும்போது அரை மணி நேரத்துக்கு ஒரு முறை 5 நிமிடங்கள் எழுந்து நடக்க ஆரம்பியுங்கள்.
இறுக்கமான ஆடைகளை அணிவது
இறுக்கமான ஆடைகள் அணிவது நம்முடைய உடலை ஃபிட்டாக வடிவமைப்புடன் காட்டும்தான்.
அதில் எந்த சந்தேகமும் இல்லை ஆனால் மிக இறுக்கமாக ஆடைகளை அணியும்போது அது உங்களுடைய பிட்டப்பகுதியில் அதிக அழுத்தத்தை உண்டாக்கும்.
இதனாலும் பருக்கள் உண்டாகும். அதனால் ஸ்டைலான அதேசமயம் கொஞ்சம் தளர்வான பேண்ட் டிசைன்கள் ஏராளமாக இருக்கின்றன. அவற்றை அணிந்து கொள்ளலாம்.
புட்டப் பருக்களை போக்க எளிய தீர்வுகள்
வாய்வழியாக மாத்திரை வடிவிலும் அதோடு சேர்த்து க்ரீம் போன்று வெளிப்பூச்சாகவும் ஆன்டி மைக்ரோபியல் மருந்துகளை எடுத்துக் கொள்வது பட் ஃபோலிகுலிடிஸ் சிகிச்சைக்குத் தீர்வாக அமையும்.
அசிலிக் அமிலம் கொண்ட ஜெல்களை இந்த வகை பருக்களை சரிசெய்யவும் அதனா்ல ஏற்பட்ட வடுக்களை மறையச் செய்யவும் பயன்படுத்தலாம்.
மேலும் சாலிசிலிக் அமிலம், டீ ட்ரீ ஆயில் ஆகியவற்றை உட்பொருளாகக் கொண்ட சோப்புகளை பயன்படுத்தினாலும் புட்டத்தில் ஏற்பட்ட பருக்களும் அதனால் உண்டாகும் தழும்புகளும் மறையும்.
புட்டப் பகுதியில் உண்டாகும் பருக்களுக்கான சிகிச்சையில் கிளைகோலிக் அமிலம், மாண்டெலிக் அமிலம் ஆகியவற்றை உட்பொருளாகக் கொண்ட க்ரீம்களும் ஜெல்களும் அதிகமாக பயன்படுத்தப்படுகின்றன. இவை பருக்களால் ஏற்பட்ட கருமை நிற வடுக்களும் தழும்புகளும் குறையும்.
ஆனால் இவற்றில் எந்த வகை க்ரீம், ஜெல் ஆகியவற்றை பயன்படுத்துவதாக இருந்தாலும் சரும நிபுணரிடம் ஆலோசனை பெற்று பயன்படுத்துவது நல்லது.