மாஸ்க்கை துவைக்காமல் ரொம்ப நாள் பயன்படுத்துவதால் கொரோனாதொற்று தவிர வேறு என்னென்ன பாதிப்புகள் ஏற்படும்...

தற்போது இந்தியாவில் டெல்டா வகை வைரஸ் அதிக அளவில் பரவி வருகிறது. இதனைத் தவிர்க்க மாஸ்க் அணிவது தான் ஒரே வழி. அப்படி அணியும் மாஸ்க்கை ஒருசிலர் சுத்தமாக துவைக்காமல் அப்படியே பயன்படுத்தி வருகின்றனர். இதன் காரணமாக பல தோல் பிரச்சனைகள் ஏற்படுகின்றன. அதிலும்,முகத்தில் ஏற்படும் தோல் ஒவ்வாமை மற்றும் தோல் அரிப்பு போன்றவை எரிச்சலுக்கு ஆளாக்கும்.

பொதுவான தோல் பிரச்சனைகளில் ஒன்று தான் இந்த மாஸ்க்னே. இது தோல் சிவந்து போதல் மற்றும் தோல் எரிச்சலுக்கு வழிவகுக்கும். மேலும், முகக் கவசம் அணிவதால் அந்த குறிப்பிட்டப் பகுதியில் சருமம் அதிக வியர்வையை வெளிப்படுத்தும். அவை, சரும துளைகளை அடைத்து முகப்பருவுக்கு வழிவகுக்கிறது.

சுகாதாரமற்ற துவைக்காத முகக் கவசங்கள் மியூகோர்மைகோசிஸ் எனப்படும் கருப்பு பூஞ்சை நோய்த் தொற்றுக்கு பங்களிக்கும் என மருத்துவ நிபுணர்கள் தெரிவித்துள்ளனர். ஆனாலும், இது உண்மையா என்று அதிகாரப்பூர்வமாக எந்த ஒரு ஆய்வும் சொல்லவில்லை.

நீங்கள் ஒருமுறை பயன்படுத்தி விட்டு பின்னர் அதனை தூக்கி எறியக்கூடிய சர்ஜிக்கல் மாஸ்க்கை தேர்வு செய்து கொள்ளுங்கள். அதேபோல் உங்களது சருமம் சென்சிட்டிவாக சருமமாக இருந்தால், மீண்டும் மீண்டும் பயன்படுத்தக் கூடிய பருத்தியால் ஆன மாஸ்க்கை பயன்படுத்தலாம். அதேவேளை, நீங்கள் ஒரு முறை பயன்படுத்திய மாஸ்க்கை துவைக்காமல் மீண்டும் ,மீண்டும் அணியக் கூடாது. அதனை நன்கு துவைத்து சுடுநீரில் அலசி, வெயிலில் காய வைத்து பின்னர் பயன்படுத்த வேண்டும் என்பதை மறந்து விடக் கூடாது.