கூந்தலை பராமரிக்க சிறந்த வழி

வேலைக்குச் செல்லும் பெண்களால் தங்களது கூந்தல் பராமரிப்புக்கு நேரம் ஒதுக்க முடிவதில்லை. இதனால் கூந்தல் உடைதல், அடர்த்தி குறைதல், மினுமினுப்பு குறைதல் போன்றவை ஏற்பட வாய்ப்புள்ளது. ஆரோக்கியமான கூந்தல் பெற அழகியல் நிபுணர்கள் என்ன கூறுகிறார்கள் எனப் பார்ப்போம்.

ரசாயனங்களைத் தவிருங்கள்

அதீத ரசாயனத் தன்மை கொண்ட ஷாம்பு, கண்டிஷ்னர் உள்ளிட்டவற்றை தினமும் பயன்படுத்துவது தவறு. இவற்றை வாரம் ஒரு முறை பயன்படுத்தலாம். இயற்கை கூந்தல் பராமரிப்பு பொருட்களை பயன்படுத்துவது நல்லது. மருதாணி சாறு, சீயக்காய், அரக்கு உள்ளிட்டவற்றை பயன்படுத்தலாம். ஆனால் இவை கூந்தலை கடினமாக்கும். கூந்தல் மென்மை பெற இறுதியில் தரமான கண்டிஷனர் பயன்படுத்துங்கள்

சோடா உப்பு, முட்டை

முட்டையை கரைத்து அதில் இரு சிட்டிகை சோடா உப்பு சேர்த்து மாதம் ஒருமுறை கூந்தலில் தடவி குளித்து வந்தால் அதன் மினுமினுப்பு அதிகரிக்கும். ஆனால் இதனை அடிக்கடி செய்யக் கூடாது. இதனால் சிலருக்கு முடி கொட்ட வாய்ப்புள்ளது.

பித்தத்தை தணிக்க வேண்டும்

சில பெண்களுக்கு இயல்பாகவே உடல் சூடு அதிகமாக இருக்கும். நம் உடலில் வாதம், பித்தம், கபம் மூன்றும் சமமான அளவில் இருக்க வேண்டும். பித்த உடல் கொண்ட பெண்கள் அடிக்கடி இளநீர், நுங்கு, நீர் காய்கள் சாப்பிடுவதால் இதனால் ஏற்படும் முடி உதிர்வை தடுக்கலாம்.

எண்ணெய் குளியல்

அலோபதி மருத்துவத்தில் எண்ணெய் கூந்தல் ஆரோக்கியத்தை பாதுக்காக்கும் என நம்பப் படுவது இல்லை. ஆனால் சித்த மருத்துவத்தில் கூந்தல் ஆரோக்கியத்துக்கு மூலிகை மற்றும் வேர் கலந்த எண்ணெய்கள் முடியின் அடர்த்தியை கட்டிக் காப்பதாக கூறப்படுகிறது. ஆனால் எண்ணெய் முடியின் வறட்சியை போக்கும் என்பதில் மாற்றுக்கருத்து இல்லை. ஆகவே வாரம் ஒருமுறையாவது எண்ணெய் குளியல் செய்வது அவசியம்.