இரும்புச்சத்து குறைபாடு
இரும்புச்சத்து குறைபாடு பெண்களுக்கு மிகவும் அதிகமாக உண்டாகிறது. பெண்களுக்கும மாதாமாதம் மாதவிடாய் ஏற்படுவதால் நிறைய ரத்த இழப்புகள் ஏற்படும். அதனால் இயல்பாகவே மிக எளிதாக அவர்களுக்கு இரும்புச்சத்து குறைபாடு உண்டாகிறது.
இரத்த சோகை என்பது இரத்தத்தில் போதுமான அளவு ஆரோக்கியமான சிவப்பு இரத்த அணுக்கள் இல்லாத ஒரு நிலையைக் குறிப்பதாகும்.இந்த ரத்த சிவப்பணுக்கள் தான் உடலின் திசுக்களுக்கு ஆக்ஸிஜனைக் கொண்டு செல்ல உதவுகிறது.
இரும்புச்சத்து குறைபாடு ஏற்படும்போது தலைச்சுற்றல், தீவிர சோர்வு, மூச்சுத் திணறல், நகங்கள் உடைவது போன்ற பிரச்சினைகள் உண்டாகும்.
கடல் உணவுகள், பேரிச்சை, சிவப்பு இறைச்சி, பீன்ஸ், கீரைகள், பட்டாணி, தானியங்கள் மற்றும் உலர்ந்த பழங்கள் மற்றும் பாதாம் ஆகியவற்றில் இரும்புச்சத்து அதிகம் இருக்கிறது.
கால்சியம் ஊட்டச்சத்து
கால்சியம் நம்முடைய உடலுக்குத் தேவையான முக்கியமான மினரலாகும். இது உடலுக்கு ஆரோக்கியமான எலும்புகள் மற்றும் பற்களை உருவாக்க உதவுகிறது. குறிப்பாக பெண்களுக்கு எலும்புத் தேய்மானப் பிரச்சினை அதிகரிக்கும். அவர்களுக்கு மிக அவசியமான ஒன்று.
உடலில் குறைந்த அளவு கால்சியம் இருப்பதால், ஆஸ்டியோபோரோசிஸ் மற்றும் ஆஸ்டியோபீனியா போன்ற பிரச்சினைகளை ஏற்படுத்தக்கூடும்.
8-19 வயதுக்குட்பட்ட பெண்கள் மற்றும் 50 வயதுக்கு மேற்பட்ட பெண்களுக்கு அதிக அளவில் இந்த கால்சியம் பற்றாக்குறை உண்டாகிறது. இவை தீவிர சோர்வு மற்றும் பலவீனம், அடிக்கடி தசைப்பிடிப்பு, தோல் பிரச்சினைகள், பலவீனமான எலும்புகள், பல் சம்பந்தப்பட்ட பிரச்சினைகள், ஒழுங்கற்ற இதயத் துடிப்பு போன்ற உடல்நல பிரச்சினைகள் உண்டாகும்.
பால், தயிர், பாலாடைக்கட்டி, சோயாபீன்ஸ், கீரைகள், மீன் வகைகள், முழு தானியங்கள் போன்றவற்றில் கால்சியம் அதிக அளவு நிறைந்திருக்கின்றன.
ஃபோலேட் சத்து பற்றாக்குறை
ஃபோலேட் சத்து வைட்டமின் பி-9 அல்லது ஃபோலிக் அமிலம் என்றும் குறிப்பிடப்படுகிறது. ஃபோலேட் நம்முடைய உடலுக்குத் தேவையான முக்கியமான ஊட்டச்சத்து ஆகும். இது இரத்த சிவப்பு அணுக்களை உருவாக்கவும் ஆரோக்கியமான செல் வளர்ச்சிக்கும் அதன் செயல்பாட்டுக்கும் உதவுகிறது.
குறிப்பாக பெண்களுக்கு ஆரம்பகால கர்ப்ப காலத்திற்கு மட்டுமல்லாது பிறப்பு குறைபாடுகளின் அபாயத்தையும் குறைக்கிறது.
ஃபோலேட் குறைபாடு ஏற்படும்போது மிகுந்த சோர்வு, சோம்பல், மூச்சுத் திணறல், தலைவலி, தலைச்சுற்றல், வெளிர் தோல் மற்றும் இதயத் துடிப்பு போன்றவற்றை ஏற்படுத்தும்.
அடர் பச்சை நிற கீரைகள் மற்றும் காய்கறிகள், பீன்ஸ், பழங்கள், முழு தானியங்கள், கடல் உணவுகள், கல்லீரல், நட்ஸ் மற்றும் விதைகள் ஆகியவற்றில் ஃபோலேட் சத்து அதிகம்.
அயோடின் சத்து குறைபாடு
நம்முடைய உடலில் உள்ள தைராய்டு சுரப்பியின் செயல்பாட்டிற்கும், தைராய்டு ஹார்மோன்களின் உற்பத்திக்கும் உடலுக்குத் தேவையான முக்கியமான தாது அயோடின் ஆகும்.
அயோடின் உடல் செயல்பாடுகளைக் கண்காணிக்கும் அதேவேளையில், உடலின் வளர்சிதை மாற்றத்தை நிர்வகிக்கவும் கட்டுப்படுத்தவும் உதவுகின்றன.
உடலில் அயோடின் அளவு குறைவாக இருந்தால், தைராய்டு சுரப்பி பெரிதாகி, கோயிட்டர் என்றும் அழைக்கப்படும் பிரச்சினை உண்டாகும்.
சிலருக்கு உடல் எடை அதிகரிக்கும். அதோடு உடல் பலவீனம், சோர்வு, முடி உதிர்தல் போன்ற பிரச்சினைகள் உண்டாகும்.
செரல் வகைகள், பால், உப்பு, முட்டை, சிக்கன், கடற்பாசி, கீரை வகைகள், தக்காளி போன்ற உணவுகளில் அயோடின் அதிகமாக இருக்கிறது.
வைட்டமின் டி பற்றாக்குறை
வைட்டமின் டி உடலின் ஆரோக்கியமான செயல்பாட்டிற்கு மிகவும் முக்கியமானது. இது நாம் உண்ணும் உணவுகள், பரிந்துரைக்கப்பட்ட சப்ளிமெண்ட்ஸ் மற்றும் சூரிய ஒளியில் இருந்து பெறக்கூடிய ஒரு அத்தியாவசிய வைட்டமினாக இருக்கிறது.
உடலில் வைட்டமின் D குறைபாடு ஏற்படும் போது உடல் சோர்வு, முதுகுவலி, முடி உதிர்தல், காயங்கள் ஆறாமல் இருப்பது போன்ற பல உடல்நலப் பிரச்சினைகளை ஏற்படுத்தும்.
வைட்டமின் D இன் சிறந்த ஆதாரம் என்றால் அது சூரிய ஒளி தான். அதையடுத்து கொழுப்பு நிறைந்த மீன், கல்லீரல்ஈ ஆலிவ் ஆயில், முட்டையின் மஞ்சள் கரு, காளான்கள், சால்மன், மத்தி போன்ற உணவுகளில் வைட்டமின் டி அதிகமாக இருக்கிறது.
வைட்டமின் பி12
நம்முடைய உடலுக்குத் தேவையான முக்கியமான வைட்டமின்களுள் ஒன்று வைட்டமின் பி12. நீரில் கரையக்கூடிய வைட்டமினான இந்த வைட்டமின் பி12 மற்ற சில வைட்டமின்களைப் போல நம்முடைய உடலால் உற்பத்தி செய்ய முடியாது. இது மூளை மற்றும் நரம்பு செல்கள் வளர்ச்சிக்கு உதவுவது மட்டுமல்லாமல், டிஎன்ஏ உற்பத்தியையும் எளிதாக்குகிறது.
தோலில் வெளிர் மஞ்சள் நிறம், புண், குளோசிடிஸ், வாய்ப்புண்கள்,பாரஸ்தீசியா, பார்வைக் குறைபாடு, எரிச்சல் மற்றும் மனச்சோர்வு ஆகியவை வைட்டமின் பி12 குறைபாட்டின் சில பொதுவான அறிகுறிகளாகும்.
பால், முட்டை, தயிர், கொழுப்பு நிறைந்த மீன்கள், சிவப்பு இறைச்சி, செரல் வகைகள், முழு தானியங்கள் ஆகியவை வைட்டமின் பி12 நிறைந்த உணவு மூலங்களாகும்.