பாதாம் பால் ரொம்ப பிடிக்குமா... அதிகமா குடிச்சா இந்த பக்க விளைவுலாம் வருமாம்... பார்த்துக்கோங்க...

பாதாம் ஒரு ஆரோக்கியமான விதையாகும். இது அதிக ஊட்டச்சத்துக்களை கொண்டுள்ளது. இதனால் விளையாட்டு வீரர்களில் துவங்கி பலரும் தினசரி சிறிதளவு பாதாமை எடுத்துக் கொள்வதை பார்க்க முடியும். பாதாமில் நார்ச்சத்து, புரதம், வைட்டமின் ஈ, மெக்னீசியம், மாங்கனீசு, தாமிரம், பாஸ்பரஸ் இன்னும் பல சத்துக்கள் உள்ளன. இவை எடை இழப்பு. எலும்பு ஆரோக்கியம் மற்றும் நமது மனநிலையை மேம்படுத்துதல் போன்ற விஷயங்களுக்கு உதவுகிறது. மேலும், இதய நோய்கள், புற்றுநோய் மற்றும் நீரிழிவு அபாயங்களை குறைப்பது வரை பல விஷயங்களுக்கு பாதாம் உதவுகிறது.

அதிகப்படியாக பாதாம் உண்பது செரிமான பிரச்சனைகளை ஏற்படுத்தலாம். இதனால் குமட்டல், வயிற்றில் அசெளகரியம், வயிற்றுப்போக்கு மற்றும் குடல் பிரச்சனைகள் போன்ற உடல் கோளாறுகள் ஏற்படலாம். அதிக அளவில் அத்தியாவசிய ஊட்டச்சத்துக்கள் மற்றும் தாதுக்களை எடுத்துக்கொள்ளும்போது இந்த மாதிரியான பிரச்சனைகள் ஏற்படலாம். சிலருக்கு இதனால் கடுமையான இரைப்பை, குடல் பிரச்சனைகளும் ஏற்படுவதுண்டு. எனவே பாதாம் அல்லது பாதாம் பாலை அதிகமாக எடுத்துக்கொள்பவர்கள் குறைவான அளவில் எடுத்துக்கொள்வது நல்லது.

சிலருக்கு முந்திரி, பாதாம் போன்ற விதைகள் ஒவ்வாமையை ஏற்படுத்தும். இதனால் அவர்களுக்கு பாதாம் பால் இயற்கையாகவே உகந்தது அல்ல. எனவே விதைகள் தொடர்பான அழற்சி பிரச்சனைகள் உள்ளவர்கள் பாதாம் பால் உட்கொள்வதை தவிர்க்க வேண்டும்.

வணிக ரீதியாக உற்பத்தி செய்யப்படும் பாதாம் பாலில் சாதரணமான பசும்பாலை விடவும் அதிகமாக சர்க்கரை உள்ளது. இது உடலுக்கு கேடு விளைவிக்கும் விஷயமாகும். எனவே முடிந்தவரை வீட்டில் பாதாம் பால் செய்து சாப்பிடலாம். மேலும் கடைகளில் பாதாம் பால் செய்யும்போது அவற்றில் அதிகமான அளவில் இனிப்பு சேர்க்கப்படுகிறது. எனவே சர்க்கரை நோயாளிகள் வெளியில் பாதாம் பால் அருந்துவதை தவிர்க்கலாம்.

அதிக அளவில் பாதாமை உட்கொள்ளும்போது அது உடலில் பல்வேறு பிரச்சனைகளை ஏற்படுத்துகிறது. முக்கியமாக தைராய்டு தொடர்பான பிரச்சனைகளை இவை அதிகரிக்கலாம். ஏனெனில் பாதாமில் தைராய்டில் தீங்கு விளைவிக்கும் இரசாயனங்கள் அதிகமாக உள்ளன. எனவே தைராய்டு செயல்பாடுகள் குறைவாக உள்ளவர்கள் பாதாம் பாலை உட்கொள்வதை தவிர்க்கவும் அல்லது மிதமான அளவில் பாதாம் பாலை உட்கொள்ளவும்.

பாதாம் பாலானது குழந்தைகளுக்கு உகந்தது அல்ல. குழந்தைக்கு தேவையான அளவிலான ஊட்டச்சத்துக்களை பாதாம் பால் வழங்குவதில்லை. மேலும் கை குழந்தைகளுக்கு பாதாம் பால் செரிமான பிரச்சனைகளை ஏற்படுத்துகின்றன. எனவே பாதாம் பாலை குழந்தைகளுக்கு அளிப்பதை தவிர்க்கவும்.

இந்த பிரச்சனைகள் அனைத்தும் பாதாம் பால் காரணமாக மக்கள் சந்திக்கும் பிரச்சனையாக உள்ளன. அதிக அளவில் பாதாம் பால் உட்கொள்வதுதான் இந்த மாதிரியான பக்க விளைவுகளை ஏற்படுத்துகிறது. எனவே குறைவாக பாதாம் பால் குடிப்பவர்கள் அல்லது எப்போதாவது குடிப்பவர்களுக்கு இதனால் பெரிய பாதிப்பு இல்லை.