குடலை குளிர்ச்சியாக்கி, ரத்த சர்க்கரை அளவை கட்டுக்குள் வைக்கும் டிராகன் பழம்...

டிராகன் புரூட் உண்மையில் கற்றாழை வகையைச் சேர்ந்தது. டிராகன் புரூட் பெரும்பாலும் மெக்ஸிகோ மற்றும் மத்திய அமெரிக்காவில் அதிகளவில் காணப்படுகிறது. இதன் சுவை கிவி மற்றும் பேரிக்காய் பழத்தின் சுவையைப் போலவே இருக்கும். இளஞ்சிவப்பு நிறத்தில் இருக்கும் இந்த பழத்தில் பைபர், மெக்னீசியம், இரும்பு, வைட்டமின் சி மற்றும் வைட்டமின் ஈ போன்ற முக்கிய ஊட்டச்சத்துகள் அடங்கியுள்ளன.

டிராகன் பழம் பைபர் மற்றும் ப்ரீ- பயோடிக்குகளால் நிரம்பியுள்ளதால் உங்கள் செரிமான அமைப்பை சீராக்க உதவும். அதுமட்டுமின்றி, உங்கள் குடல் ஆரோக்கியத்தையும் இது கட்டுக்குள் வைத்திருக்க உதவும் என்று ஆய்வாளர்கள் கண்டறிந்துள்ளனர். அத்தோடு எடை பராமரிப்பு, இரத்த சர்க்கரை அளவைக் கட்டுப்படுத்துதல் மற்றும் இதய நோய்களைத் தடுக்கவும் டிராகன் பழம் சிறந்தது என்று ஆய்வுகள் கூறுகின்றன.

டிராகன் பழத்தில் உள்ள பெட்டாசியானின்கள் மற்றும் பெட்டாக்சாண்டின்கள் போன்ற ஆக்ஸிஜனேற்றங்களைக் கொண்டுள்ளது. அவை ப்ரீ ரேடிக்கல்கள் போன்ற சரும பிரச்சனைகளை எதிர் கொள்ள உதவும். டிராகன் பழம் பொதுவான அழற்சியைக் குறைப்பதற்கும், கீல்வாதம் போன்ற அழற்சி குறைபாடுகளை குறைக்கவும் சிறந்தது. இளஞ்சிவப்பு நிறத்தில் உள்ள டிராகன் பழம் தான் நன்கு கனிந்த பழம் தான். பச்சை நிறத்தில் உள்ள பழம் கனியாத பழம்.

வெள்ளை நிறத்தில் கருப்பு விதைகளுடன் காணப்படும் இந்த பழத்தை விதையுடன் சேர்த்து உண்ணலாம். டிராகன் பழத்தை நீங்கள் நீண்ட நாட்கள் வைத்திருக்க விரும்பினால் அதன் மேல் சிறிதளவு சுண்ணாம்பு நீர் தெளித்து வைத்திருக்கலாம். டிராகன் பழத்தை சாலட் போல் செய்தும் உண்ணலாம்.