தைராய்டு பிரச்சினை உள்ளவர்கள் என்ன அதிகம் சாப்பிடணும், என்ன சாப்பிடவே கூடாது...

பொதுவாக தைராய்டு பிரச்சினை உள்ளவர்களுக்கு தொண்டைப் பகுதியில் வித்தியாசங்கள் தோன்றும்.

ஹைப்பர் தைராய்டு (தைராய்டு சுரப்பி அதிகமாக சுரப்பது) உள்ளவர்களுக்கு உடல் எடை குறைய ஆரம்பிக்கும்.

ஹைப்போ தைராய்டு (தைராய்டு சுரப்பி குறைவாக சுரப்பது) உள்ளவர்களுக்கு எடை கூடிக்கொண்டே போகும்.

உடல் சோர்வு, எப்போதும் ஒருவித பதற்றமான மனநிலையே காணப்படும்.

இரண்டில் எந்த வகை தைராய்டாக இருந்தாலும் அவர்களால் பெரிதாகக் குளிரைத் தாங்கிக் கொள்ளவே முடியாது.

தைராய்டு உள்ளவர்கள் தங்களுடைய தினசரி டயட்டில் சில உணவுகளைச் சேர்த்துக் கொள்ள வேண்டும். சில உணவுகளைத் தவிர்க்க வேண்டும்.

ஏனெனில் நாம் உண்ணு் உணவுகள் நம்முடைய உடலில் உள்ள உறுப்புகள் மற்றும் சுரப்பிகளின் செயலைத் தூண்டும். அதேபோல தான் தைராய்டு சுரப்பிகளும். நாம் உண்ணும் உணவுகளின் தன்மைக்கேற்ப அதன் செயல்பாட்டிலும் மாறுதல்கள் ஏற்படும்.

அதனால் தைராய்டால் பாதிக்கப்பட்டவர்கள் என்ன உணவை அதிகமாக எடுக்கலாம், எதை தவிர்க்கலாம் என்று பார்க்கலாம்.

இலைவடிவ காய்கள்

இலைவடிவ காய்கறிகளான முட்டைகோஸ், காலிஃபிளவர், ப்ரக்கோலி போன்ற காய்கறிகளை தைராய்டு பிரச்சினை உள்ளவர்கள் தவிர்ப்பது நல்லது. ஏனெனில் இந்த காய்கறிகள் ஹார்மோன் ஏற்றத்தாழ்வுகளை உண்டாக்கும். அதனால் தைராய்டு சுரக்கும் ஹார்மோனிலும் சிக்கல்கள் உண்டாகும்.

சல்பர் நிறைந்த உணவுகள் உடலுக்கு நன்மை பயப்பனவை தான். ஆனால் தைராய்டு பிரச்சினை உள்ளவர்கள் சோளம், சர்க்கரை வள்ளிக்கிழங்கு, உருளைக்கிழங்கு, ஆளி விதை, சியா விதை போன்ற சல்பர் அதிகம் உள்ள உணவுகளைத் தவிருங்கள். ஏனெனில் இவை ஹார்மோன் சுரப்பை அதிகப்படுத்தும்.

சோடியம் சத்துக்கள் நிறைந்த உணவுகளை தைராய்டு பிரச்சினை உள்ளவர்கள் குறைத்துக் கொள்ள வேண்டும்.

அதிலும் குறிப்பாக பதப்படுத்தப்பட்ட உணவுகளை முற்றிலும் தவிர்ப்பது தான் நல்லது. அதில் சேர்க்கப்படும் அதிகப்படியான உப்பு நம்முடைய உடலில் இயல்பாக இருக்கும் அயோடினின் அளவை பாதிக்கும்.

அயோடின் குறைபாடு ஏற்பட்டால் தைராய்டு பிரச்சினையும் அதனால் ஏற்படும் விளைவுகளும் அதிகமாகும்.

பால்

தைராய்டு பிரச்சினை உள்ளவர்கள் நிறைய பேர் பாலில் கொழுப்பு இருப்பதால் அதை தங்களுடைய உணவில் தவிர்க்கிறார்கள்.

ஆனால் கொழுப்பு குறைவாக உள்ள பாலை திளசரி உணவில் நிச்சயம் எடுத்துக் கொள்ளலாம்.

ஏனெனில் பாலில் கால்சியம் சத்துடன் இணைந்த அயோடின் சத்தும் இருப்பதால் அது நம்முடைய உடலுக்குத் தேவையான தினசரி அயோடின் அளவில் 30 சதவீதத்தைப் பூர்த்தி செய்கிறது.

வீட்டிலேயே குறைந்த கொழுப்புள்ள பாலிலிருந்து தயாரிக்கப்படும் தயிரை தினமும் சிறிதளவு சேர்த்துக் கொள்ளலாம். இதிலும் அயோடின் நிறைந்திருக்கிறது. அதோடு புரோபயோடிக் நிறைந்திருப்பதால் உடலில் நல்ல பாக்டீரிக்களை உற்பத்தி செய்யும்.

முட்டையில் முழுக்க முழுக்க புரதமும் மஞ்சள் கருவில் கொழுப்பு மட்டும் நிறைந்திருக்கிறது என்று நினைத்துக் கொண்டிருக்கிறோம். ஆனால் முட்டையில் வேறு சில சத்துக்களும் நிரம்பவே இருக்கின்றன.

குறிப்பாக தைராய்டு சுரப்பிகளை முறையாக, அளவோடு சுரக்கச் செய்யத் தேவையான அயோடின் சத்து கிட்டதட்ட 17 சதவீதம் வரையிலும் இருக்கிறது.

அதோடு செலீனியம் சத்தும் அதிகமாக இருக்கிறது. இவை தைராய்டு சுரப்பியின் இயக்கத்தைச் சீராக வைத்திருக்க உதவுகின்றன.

முழு தானியங்களில் அதிக அளவில் வைட்டமின் பி ஊட்டச்சத்து நிரம்பியிருக்கும். குறிப்பாக, பார்லி, சிறுதானியங்கள், ஓட்ஸ், சம்பா மற்றும் பிரௌன் ரைஸ் ஆகியவற்றை அதிகமாகச் சேர்த்துக் கொள்வது நல்லது.

இவை தைராய்டு சுரப்பிகளின் இயக்கத்தைத் தூண்டி, உடலுக்குத் தேவையான அளவு தைராய்டு ஹார்மோன்களைச் சுரக்கச் செய்யும். அதோடு உடலில் மெட்டபாலிசத்தை அதிகரிக்கச் செய்யும்.