வேர்க்கடலையில் உள்ள ஊட்டச்சத்துக்கள்
வேர்க்கடலையில் நம்முடைய உடலுக்குத் தேவையான பல அத்தியாவசிய ஊட்டச்சத்துக்கள் நிறைந்திருக்கின்றன. அவை,
புரதச்சத்து,
நார்ச்சத்துக்கள்,
கொழுப்புச்சத்து,
கார்போஹைட்ரேட்,
கால்சியம்,
காப்பர்,
பொட்டாசியம்,
இரும்புச்சத்து,
சோடியம்,
மக்னீசியம்,
துத்தநாகம்,
பாஸ்பரஸ்
ஆகிய ஊட்டச்சத்துக்கள் இதில் நிறைந்திருக்கின்றன.
எடை குறைக்க உதவும் வேர்க்கடலை
வேர்க்கடலையில் புரதச்சத்தும் நார்ச்சத்தும் அதிகமாக இருக்கிறது. இவை இரண்டுமே உடல் எடையைக் குறைக்க உதவி செய்யும்.
நார்ச்சத்துக்கள் பொதுவாக ஜீரணத்தை எளிதாக்கவும் சாப்பிட்டதும் வயிறு நிரம்பிய உணர்வையும் தரும். அதனால் அதிகமான கலோரிகள் எடுத்துக் கொள்வதை தவிர்த்து உடல் எடையைக் கட்டுக்குள் வைத்திருக்க முடியும்.
நீரிழிவு நோயாளிகளுக்கு வேர்க்கடலை
நீரிழிவு நோயாளிகள் தங்களுடைய டயட்டில் மக்னீசியம் நிறைந்த உணவுகளை அதிகமாக எடுத்துக் கொள்வது நல்லது. இது ரத்தத்தில் உள்ள சர்க்கரை அளவு அதிகரிக்காமல் கட்டுக்குள் வைத்திருக்க உதவி செய்யும்.
இந்த மக்னீசியம் வேர்க்கடலையில் அதிகமாக இருக்கிறது. நம்முடைய உணவில் உள்ள மற்ற கார்போஹைட்ரேட் மற்றும் கொழுப்புகளை வேகமாக ஜீரணிக்கச் செய்து, மெட்டபாலிசத்தை அதிகரித்து ரத்தத்தின் சர்க்கரை அளவை குறைக்க வேர்க்கடலை உதவி செய்யும்.
இதய ஆரோக்கியத்தை மேம்படுத்தும் வேர்க்கடலை
பொதுவாக வேர்க்கடலை என்றாலே அதிக கொழுப்பு கொண்டது. அதனால் அதை தவிர்ப்பது தான் நல்லது என்று தான் நம்மில் நிறைய பேர் நினைத்துக் கொண்டிருக்கிறோம்.
ஆனால் உண்மை என்னவென்றால். வேர்க்கடலையில் உள்ளவை அனைத்தும் நல்ல கொழுப்புகள் தான். அவை இதய ஆரோக்கியத்தை மேம்படுத்தக் கூடியவை.
குறிப்பாக வேர்க்கடலையில் ஓலிக் அமிலம், மோனோசாச்சுரேட்டட் மற்றும் பாலிசாச்சுரேட்டட் கொழுப்புகள் அதிகமாக இருக்கின்றன. இவை நம்முடைய உடலில் உள்ள கெட்ட கொலஸ்டிராலின் அளவைக் குறைத்து நல்ல கொலஸ்டிராலை அதிகரிக்கச் செய்கிறது.
மனக்கவலையை குறைக்கும் வேர்க்கடலை
வேர்க்கடலையில் அமினோ - அமிலங்கள் நிறைந்திருக்கின்றன. குறிப்பாக வேர்க்கடலையில் உள்ள டிரைபோட்டஃபன் என்னும் ரசாயனத்தை மூளையில் உற்பத்தி செய்ய உதவி, மனஅழுத்தம், மனச் சோர்வு ஆகியவற்றைக் குறைக்கச் செய்கிறது.
தினமும் ஒரு கைப்பிடி அளவு வேர்க்கடலையை சாப்பிடுவதன் மூலம் மனநிலை மேம்படும்.
தலைமுடி மற்றும் சரும ஆரோக்கியத்துக்கு வேர்க்கடலை
வேர்க்கடலையில் உள்ள ஆரோக்கியமான கொழுப்புகள் சருமத்தை பொலிவாக்கும்.
வேர்க்கடலையில் வைட்டமின் சி மற்றும் வைட்டமின் ஈ ஆகியவை அதிக அளவில் இருப்பதால் இது சருமத்தை இளமையாக வைத்திருக்க உதவுவதோடு வயதான தோற்றம் ஏற்படுத்துவதை தடுக்கிறது. சரும சுருக்கங்களை நீக்கும்.
பொதுவாக குளிர்காலத்தில் முடி உதிர்தல் அதிகமாக இருக்கும். இந்த சமயத்தில் வேர்க்கடலையை உணவில் சேர்த்துக் கொள்ளும்போது அதன்மூலம் பயோடின் உற்பத்தி அதிகரிக்கும். பயோடின் நம்முடைய தலைமுடியின் வளர்ச்சியைத் தூண்டும்.
இவ்வளவு ஆரோக்கியம் நிறைந்த வேர்க்கடலையை நம்முடைய கெட்ட கொலஸ்டிராலை அதிகரிக்கச் செய்யாமல் எப்படியெல்லாம் சாப்பிடலாம் என்று பார்க்கலாம்.
உடலுக்கு ஆற்றல் தரும் வேர்க்கடலை ஸ்மூத்தி
தேவையான பொருள்கள்
- ஊறவைத்த வேர்க்கடலை - ஒரு கைப்பிடி
- வாழைப்பழம் - 1
- தேன் (அ) நாட்டுச்சர்க்கரை - 1 ஸ்பூன்
- ஆளி விதை - அரை ஸ்பூன்
- ஏலக்காய் - 1
செய்முறை
இரவு முழுவதும் வேக்கடலையை தண்ணீரில் ஊற வைத்து எடுத்துக் கொள்ள வேண்டும்.
ஊறவைத்த வேர்க்கடலையுடன் வாழைப்பழங்களை சிறு துண்டுகளாக நறுக்கி சேர்த்துக் கொள்ளுங்கள்.
இந்த கலவையை மிக்ஸி ஜாரில் சேர்த்து சிறிது தண்ணீர் அல்லது பால் சேர்த்து நன்கு அரைத்துக் கொள்ளுங்கள்.
அரைத்த ஸ்மூத்தியில் நாட்டுச் சர்க்கரை அல்லது தேன் கலந்து காலை உணவுக்கு பதில் எடுத்துக் கொண்டால் மதியம் வரை வயிறு நிரம்பிய உணர்வோடே இருக்கும். பசி எடுக்காது. இன்றைய நாள் முழுக்க உடல் சுறுசுறுப்பாகவே இருக்கும்.
வேர்க்கடலை சாலட்
தேவையான பொருள்கள்
- வேர்க்கடலை - 1 கப்
- கேரட் - 1
- வெள்ளரிக்காய் - 1
- வெங்காயம் - 1,
- எலுமிச்சை சாறு - 1 ஸ்பூன்
- சாட் மசாலா - சுவைக்கு ஏற்ப
- மிளகுத்தூள் - கால் ஸ்பூன்
- மாங்காய் துண்டுகள் - சிறிதளவு
- பச்சை மிளகாய் - 1
- கொத்தமல்லி இலைகள - சிறிதளவு
செய்முறை
வேர்க்கடலையை நன்கு தண்ணீரில் ஊறவைத்து வேகவைத்து எடுத்துக் கொள்ள வேண்டும்.
கேரட், வெங்காயம், வெள்ளரிக்காய் ஆகியவற்றை பொடியாக நறுக்கி எடுத்துக் கொள்ளவும்.
வேகவைத்த வேர்க்கடலையுடன் நறுக்கிய வெங்காயம், கேரட், வெள்ளரிக்காய் ஆகியவற்றைச் சேர்த்து கலந்து கொள்ளுங்கள். அதனுடன் சாட் மசாலா, மிளகுத்தூள், உப்பு, கொத்தமல்லி இலை, பச்சை மிளகாய் ஆகியவற்றைச் சேர்த்து கலந்து, மேலே எலுமிச்சை சாறு பிழிந்தால் சுவையான வேர்க்கடலை சாலட் தயார். மாங்காய் கிடைத்தால் இதில் மாங்காய் சேர்க்கலாம்.
மாலை நேரத்தில் தேவையில்லாத நொறுக்குத் தீனி போன்றவற்றிற்கு பதிலாக இந்த வேர்க்கடலை சாலட்டை எடுத்துக் கொள்வதன் மூலம் உடல் எடையும் கட்டுக்குள் வைக்க முடியும். இரவு உணவில் அதிக கலோரிகள் எடுத்துக் கொள்ளாமல் தவிர்க்க முடியும்.