ஆரோக்கியம் அள்ளித்தரும் அத்திப்பழ ஹல்வா!

மற்ற பழங்களைக் காட்டிலும் அதிக மருத்துவ குண்ம் கொண்ட அத்திப்பழத்தை பயன்படுத்தி இனிப்பான ஹல்வா செய்வது பற்றி பார்க்கலாம்.

மருத்துவ குணங்கள் :

பழங்களில் மிகுந்த மருத்துவ குணம் கொண்ட, அத்திப்பழம் சர்க்கரை நோய், சர்க்கரைப் புண், உடல் வீக்கம், கட்டிகள் நீர்க்கட்டிகள், புண், சொறி சிரங்கு, நமைச்சல், கண்களின் பார்வை குறைபாடு, இரத்தச் சோகை போன்ற பாதிப்புகள் உள்ளவர்களுக்கு அத்திப் பழம் மிகச் சிறந்த பலன் தருகிறது. மேலும் இவை கல்லீரல் – மண்ணீரல் அடைப்புகள், வீக்கங்களைப் போக்கப் பயன்படுகிறது.

தேவையான பொருட்கள் :

பால் - 1 1/2 லிட்டர்

அத்திப்பழம் - 150 கிராம்

பேரீச்சம் பழம் - 3

நெய் - 150 கிராம்

சீனி - 400 கிராம்

பாதாம் - 100 கிராம்

முந்திரி - 100 கிராம்

பிஸ்தா - 25 கிராம்

செய்முறை:

தேவையான பொருட்கள் அனைத்தையும் தயாராக எடுத்து வைத்துக் கொள்ளவும். பாதாம், முந்திரி, பிஸ்தா ஆகியவற்றை இரு பாதியாக பிரித்து வைத்து, அதில் ஒரு பாதியை பொடியாக நறுக்கி கொள்ளவும். மறுபாதி பருப்புகளை நீளவாக்கில் நறுக்கி வைக்கவும்.

பாலை ஒரு நாண் ஸ்டிக் பாத்திரத்தில் ஊற்றி காய்ச்சவும்.அத்திப்பழம், பேரீச்சம் பழத்தை சிறிய துண்டுகளாக நறுக்கி காய்ச்சிய பாலில் அரை மணி நேரம் ஊற வைக்கவும். ஊற வைத்த பழங்களை மிக்ஸியில் போட்டு விழுதாக அரைத்து பாலில் போட்டு நன்கு காய்ச்சவும். பால் கொதித்து நன்கு வற்றி வரும் போது சீனியை சேர்த்து கிளறி விடவும்.

பிறகு பொடியாக நறுக்கி வைத்திருக்கும் பருப்புகளை சேர்த்து கிளறவும். நல்ல கெட்டியாக வரும் போது தீயை மிதமாக வைத்து நெய்யை சேர்த்து கிளறி விடவும்.ஹல்வா நன்கு கெட்டியாகி சுருண்டு வந்ததும் நீளவாக்கில் நறுக்கிய பருப்புகளில் சிறிதை சேர்த்து கிளறி இறக்கவும்.

பின் ஒரு டப்பாவில் நெய் தடவி அதில் ஹல்வாவை கொட்டி பரப்பி விடவும். மேலே மீதமிருக்கும் பருப்புகளை தூவி அலங்கரிக்கவும். சுவையான, சத்தான அத்திப்பழ ஹல்வா தயார்.