டிவிக்கு டாட்டா சொல்லி டேட்டாவுக்கு வெல்கம் சொல்லும் உலகம்!

உலக அளவில் தொலைக்காட்சி பார்வையாளர்களின் எண்ணிக்கை பெரும் சரிவைச் சந்தித்துள்ளதாக தனியார் நிறுவனம் ஒன்றின் கருத்துக்கணிப்பு முடிவில் தெரியவந்துள்ளது.

அக்சென்சர் நிறுவனம் நடத்திய இந்த கருத்துக்கணிப்பு உலகம் முழுவதும் உள்ள 26,000 பேரிடம் நடத்தப்பட்டது. இதில், நிகழ்ச்சிகளை தொலைக்காட்சியில் பார்க்க விரும்பவர்கள் 23 சதவீதம் மட்டுமே இருப்பதாக கூறப்பட்டுள்ளது. கடந்த ஆண்டு 52 சதவீதமாக இருந்த இந்த அளவு இந்த ஆண்டு வெகுவாகக் குறைந்துள்ளது.

42 சதவீதம் பேர், அதாவது 10 பேரில் 4க்கும் மேற்பட்டவர்கள் ஸ்மார்ட் போன், லேப்டாப், டெஸ்க் டாப் ஆகிவற்றில் நிகழ்ச்சிகளைப் பார்ப்பதற்கே விரும்புகிறார்கள். கடந்த ஆண்டு நடத்திய கருத்துக்கணிப்பில் 32 சதவீதமாக இருந்த அளவு இப்போது அதிகமாகியுள்ளது.

கடந்த 2014ஆம் ஆண்டு நடத்தப்பட்ட கருத்துக்கணிப்பின் முடிவுகளுடன் ஒப்பிடும் போது தற்போதைய முடிவுகள் பெரும் மாற்றத்தை பிரதிபலிக்கின்றன. 2014ல் 65 சதவீதத்தினர் (மூவரில் இருவர்) தொலைக்காட்சியில் நிகழ்ச்சிகளைக் காண்பதற்கே விரும்பம் தெரிவித்திருந்தனர். சமீபத்திய முடிவின் படி, 19 சதவீதத்தினர் (ஐவரில் ஒருவர்) மட்டுமே தொலைக்காட்சிகளை விரும்புகின்றனர்.

பரவலாகிவிட்ட இணைய பயன்பாடு, இணையத்தில் கிடைக்கும் உயர்தர வீடியோக்கள், இணைய நேரலை ஒளிபரப்பு ஆகியவை இந்த மாற்றத்திற்குக் முக்கியமான காரணங்களாகக் கருதப்படுகிறது.