தமிழ் திரையுலக பிரபலங்கள் முதல் முறை சிறு வேடங்களில் தோன்றிய திரைப்படங்கள் எவை தெரியுமா?

மைனா மூலம் தான் தனக்கான பெயரை தமிழ் திரைத்துறையில் பதித்தார் விதார்த். ஆனால், இவர் முதல் முறை தோன்றிய படம் மின்னலே. பரீட்சை எழுதும் காட்சி ஒன்றில் நடித்திருந்தார்.

போடா போடி இயக்குனராக தான் விக்னேஷ் சிவனை பலரும் அறிவார்கள். அதற்கு முன், உதவி இயக்குனராக பணியாற்றிய போது, இவர் 2007ம் ஆண்டு வெளியான சிவி எனும் த்ரில்லர் படத்தில் ஒரு காட்சியில் நடித்திருந்தார்.

லொள்ளு சபா மூலமாக பிரபலம் அடைந்தவர் நடிகர் சந்தானம். இவர் 2002ம் ஆண்டு வெளியான பேசாத கண்ணும் பேசும் என்ற படத்தில் குணால் உடன் ஒரு காட்சியில் நடித்திருந்தார். 2004ம் ஆண்டு வெளியான மன்மதன் படத்தில் தான், சந்தானத்தின் பெயர் டைட்டில் கார்டில் இடம் பெற்றிருந்தது குறிப்பிடத்தக்கது.

காமெடி நடிகர் அப்புக்குட்டியை வெண்ணிலா கபடி குழு படம் மூலமாக தான் அனைவரும் அறிந்தனர். ஆனால், இவர் 1998ம் ஆண்டு வெளியான மறுமலர்ச்சி படத்திலேயே ஒரு காட்சியில் தோன்றியிருப்பார். பிறகு, கில்லி, அழகியதமிழ்மகன் படங்களிலும் இவர் சிறுசிறு வேடத்தில் நடித்திருந்தார்.

இயக்குனர் எஸ்.ஜே சூர்யா வாலி, குஷி படங்களின் மூலம் பிரபலம் அடைந்தவர். குஷி படத்தின் ஆரம்ப காட்சியிலும் இவர் நடித்திருப்பார். ஆனால், 1988ம் ஆண்டு பாண்டியராஜன் இயக்கத்தில் வெளியான நெத்தியடி படத்தில் இவர் ஒரு காட்சியில் தோன்றி இருப்பார்.

மேலும், பாரஜிராஜாவின் இயக்கத்தில் 1993ம் ஆண்டு வெளியான கிழக்கு சீமையிலே படத்திலும்

இயக்குனர் வசந்த் இயக்கத்தில் 1995ம் ஆண்டு வெளியான ஆசை படத்திலும் சிறு சிறு வேடங்களில் தோன்றி இருந்தார் இயக்குனர் எஸ்.ஜே சூர்யா.

நடிகர் பாவனை நிறைய திரைப்படங்களில் ரசிகர்கள் பார்த்திருக்க வாய்ப்புகள் உண்டு. ஆயினும், இவரை சரியாக நடிகராக பயன்படுத்தியவர் இயக்குனர் வெற்றிமாறன் தான். பொல்லாதவன் படம் இவருக்கு முக்கிய திருப்புமுனையாக அமைந்தது. நடிகை பவன் 1997ம் ஆண்டு வெளியான ராசி படத்தில் அஜித்துடன் நடித்திருந்தார்.

ஆனாலும், நடிகராக டைட்டில் கார்டில் இவர் பெயர் வந்தது, 2005ம் ஆண்டு வெளியான அஜித்தின் ஜீ படத்தில் தான்.

லேகா வாஷிங்க்டன் எஸ்.எஸ். மியூசிக் தொகுப்பாளினியாக தான் பிரபலம் ஆனார். ஆனால், இவர் 1999ம் ஆண்டு வெளியான காதலர் தினம் படத்தில் ஆரம்ப பாடல் காட்சியில் தோன்றி இருந்தார்.

மேலும், உன்னாலே உன்னாலே படத்தில் ஒரு பாடல் காட்சியிலும் நடித்திருந்தார் லேகா வாஷிங்க்டன். இவர் முழுநீள கதாபாத்திரத்தில் நடித்தது, கண்ணன் இயக்கத்தில் வெளியான ஜெயம் கொண்டான் திரைப்படம் தான்.

இசை அமைப்பாளராக இருந்து, நடிகரானவர் விஜய் ஆண்டனி. ஆனால், இவர் 2006ம் ஆண்டு வெளியான கிழக்கு கடற்கரை சாலை படத்திலேயே ஒரு சிறு வேடத்தில் நடித்திருந்தார்.

இயக்குனர் பாண்டியராஜன் பாக்யராஜ் அவர்களிடம் உதவி இயக்குனராக பணியாற்றி வந்தவர். அவரை போலவே இவர் நடிக்கவும் செய்தார். ஆனால், இவர் முதன்முதலில் திரையில் தோன்றியது, 1981ம் ஆண்டு வெளியான அந்த 7 நாட்கள் படத்தில் தான்.

சுந்தர் சி இயக்கிய முதல் திரைப்படம் முறைமாமன். ஆனால், அதற்கு முன், 1990ம் ஆண்டு இயக்குனர் மணிவண்ணன் இயக்கத்தில் வெளியான வாழ்க்கை சக்கரம் படத்தில் ஒரு சிறிய வேடத்தில் தோன்றி இருப்பார் சுந்தர் சி.

அகில உலக சூப்பர் ஸ்டார் என்று ரசிகர்கள் போற்றப்படும் மிர்ச்சி சிவா பிரபலமானது ரேடியோ மற்றும் சென்னை 28 படத்தின் மூலம் தான். ஆனால், தலைவர் 2001ம் ஆண்டு கமல் நடிப்பில் வெளியான ஆளவந்தான் திரைப்படத்தில் ஒரு பாடல் காட்சியில் தோன்றி இருப்பார்.

என்றும் இளமை இளவரசி த்ரிஷா 1999ம் ஆண்டு பிரசாந்த் - சிம்ரன் நடிப்பில் வெளியான ஜோடி திரைப்படத்தில் சிறு வேடத்தில் நடித்திருந்தார் இது பலரும் அறிந்தது தான்.

தீனா திரைப்படம் மூலம் பிரபலம் ஆனவர் இயக்குனர் முருகதாஸ். ஆனால், இதற்கு முன்பே, 1997ம் ஆண்டு பூச்சூடவா படத்தில் சிறு வேடத்தில் தோன்றி இருப்பார் முருகதாஸ்.

அட்டக்கத்தி திரைப்படம் மூலம் பிரபலம் ஆனவர் நடிகர் தினேஷ், இதற்கு முன் 2006ம் ஆண்டு ஜனநாதன் இயக்கத்தில் வெளியான ஈ படத்தில் தோன்றி இருந்தார்.

பரியேறும் பெருமாள் திரைப்படம் மூலம் பிரபலமானவர் மாரி செல்வராஜ். இவர் 2007ம் ஆண்டு வெளியான கற்றது தமிழ் திரைப்படத்திலேயே சிறு வேடத்தில் தோன்றி இருந்தார். இவர் இயக்குனர் ராமிடம் உதவியாளராக பணியாற்றையவர் என்பது குறிப்பிடத்தக்கது.

நடிகை அமலா பால் மைனா திரைப்படம் மூலம் பிரபலமானவர். இவர் முதலில் நடித்த திரைப்படம் 2010ம் ஆண்டு வெளியான வீரசேகரன்.

1982ம் ஆண்டு பாக்யராஜ் இயக்கத்தில் வெளியான டார்லிங் டார்லிங் டார்லிங் படத்தில் தான் முதன் முதலில் சிறு வேடத்தில் நடித்திருந்தார் நடிகர் லிவிங்ஸ்டன். இப்படத்தில் இவர் உதவி இயக்குனராகவும் பணியாற்றி இருந்தார்.

முண்டாசுப்பட்டியில் அவரது கதாபாத்திர பெயரை அவரது சினிமா பெயராக நிலைத்துவிட்டது. இவரது இயற்பெயர் ராமதாஸ். ஆனால், ராமதாஸ் 2003ம் ஆண்டு பார்த்திபன் இயக்கத்தில் காதல் கிறுக்கன் படத்தில் சிறு வேடத்தில் தோன்றி இருந்தார்.

12பி, உள்ளம் கேட்குமே, லேசா, லேசா, இயற்கை போன்ற படங்களில் நடித்த நடிகர் ஷாம். முதலில் தோன்றிய படம், 2000ம் ஆண்டு வெளியான விஜயின் குஷி. பிறகு தான் 2001ம் ஆண்டு ஜோதிகா, சிம்ரன் உடன் 12 பி படத்தில் கதாநாயகனாக அறிமுகமானார்.

நடிகரும், இயக்குனருமான மாரிமுத்து நிறைய குணச்சித்திர வேதங்கள் ஏற்று நடித்து வருகிறார். இவர் நடித்த முதல் திரைப்படம் வாலி. அதில், விவேக் செல்லும் போட்டோ கடையில் பணியாற்றுவது போன்ற சிறு வேடத்தில் நடித்திருந்தார். மேலும், வாலி படத்தில் இவர் துணை இயக்குனராகவும் வேலை செய்திருந்தார்.

பிறகு 2004ம் ஆண்டு விஜய் - சிம்ரன் நடிப்பில் வெளியான உதயா திரைப்படத்தில் ஒரு சிறு வேடத்தில் நடித்திருந்தார் மாரிமுத்து.

ராட்சசன் படத்தில் நடித்த சரவணனுக்கு பெரிய பெயர் கிடைத்தது. அவரது நடிப்பை பலரும் பாராட்டினார்கள். ஆனால், இவர் முதன் முதலில் தோன்றிய படம் 2011ம் ஆண்டு வெளியான மௌன குரு ஆகும்.

தனது அறிமுக படமான சித்திரம் பேசுதடி மூலமாகவே தன் இயக்குனர் திறமையை பதிவு செய்தவர் மிஸ்கின். ஆனால், அதற்கு முன், இவர் 2002ம் ஆண்டு விஜய் நடிப்பில் வெளியான யூத் படத்தில் சிறு வேடத்தில் தோன்றி இருப்பார்.

சுவாமிநாதன் விஜய் டிவியில் வெளியான லோல்ல்லு சபா நிகழ்ச்சி மூலம் பிரபலமான நடிகர். ஆனால், இவர் 1980களில் இருந்தே நடித்து வருகிறார். 1985ம் ஆண்டு விஜயகாந்த் நடிப்பில் வெளியான நானே ராஜா நானே மந்திரி படத்தில் சிறு வேடத்தில் நடித்திருந்தார் சுவாமிநாதன்.

ஒளிப்பதிவாளராக இருந்து இயக்குனராகவும் தனது பெயரை ஆழமாக பதிவு செய்திருப்பவர் கே.வி. ஆனந்த் அவர்கள். ஆனால், இவர் முதன் முதலில் திரையில் தோன்றியது, பி.சி. ஸ்ரீராம் இயக்கத்தில் 1992ம் ஆண்டு வெளியான மீரா திரைப்படத்தில் ஆகும். பிறகு தான் 1994ம் ஆண்டு ப்ரியஷர்ஷன் இயக்கத்தில் மோகன் லால் நடித்த தென்மாவின் கொம்பத்து என்ற படத்தில் ஒளிப்பதிவாளராக பணியாற்றினார் கே.வி. ஆனந்த்.