ஜியோவை விட 3 ரூபாய் குறைவான விலை: ஐடியாவின் புதிய ஆஃபர்

ரிலையன்ஸ் ஜியோவை விட 3 ரூபாய் குறைந்த விலையில் புதிய ஆஃபர் ஒன்றை ஐடியா நிறுவனம் அறிவித்துள்ளது.

ரிலையன்ஸ் ஜியோ நிறுவனம் வெல்கம் ஆஃபர், ஹேப்பி நியூ இயர் ஆஃபர் என்ற பெயர்களில் அளித்து வந்த இலவச சேவை மார்ச் 31ஆம் தேதியுடன் முடிகிறது. ஏப்ரல் 1ஆம் தேதி முதல் கட்டண சேவை தொடங்கும் ஜியோ, தொடர்ந்து மிகக் குறைந்த விலையில் தற்போது உள்ளது போன்ற இலவச சேவையைத் தொடர ஜியோ ப்ரைம் உறுப்பினராகும் வசதியை அளிக்கிறது. ரூ.99 ஆண்டுச்சந்தா செலுத்தி ஜியோ ப்ரைம் உறுப்பினராக வேண்டும். பின் மாதம் தோறும் ரூ.303 செலுத்தினால் தினசரி 1GB 4G டேட்டா மற்றும் அனைத்து வாய்ஸ் கால்கள் இலவசமாகப் பெறலாம்.

இந்த ஆஃபரை மிஞ்சம் விதமாக ஐடியா நிறுவனம் புதிய ஆஃபர் ஒன்றை அறிவித்துள்ளது. ரூ.300 கட்டணத்தில் ஓர் ஆண்டுக்கு (மார்ச் 31, 2018 வரை) தினசரி 1GB டேட்டா அளிக்கும் போஸ்ட் பெய்ட் (Post Paid) ஆஃபரை ஐடியா அறிமுகம் செய்துள்ளது. இந்த ஆஃபரைப் பெறவும் சலுகைகள் அளிக்கிறது.

தற்போது ரூ.199 முதல் ரூ349 வரையான திட்டத்தில் இருப்பவர்கள் இந்த சலுகையை ரூ.100 சலுகையில் ரூ.200க்குப் பெறலாம். ரூ.349 முதல் ரூ449 வரையான திட்டத்தில் இருப்பவர்கள் இந்த சலுகையை ரூ.250 சலுகையுடன் ரூ.50க்குப் பெறலாம். ரூ.499 அல்லது அதற்கு மேற்கட்ட கட்டணம் செலுத்தும் திட்டத்தில் இருப்பவர்களுக்கு இந்த ஆஃபர் முற்றிலும் இலவசமாகக் கிடைக்கும்.