திருப்பதி லட்டுவுக்கு ஜிஎஸ்டி வரி கிடையாது!

திருப்பதி கோவிலில் வழங்கப்படும் லட்டுவுக்கு ஜிஎஸ்டி வரி கிடையாது என மத்திய அரசு அறிவித்துள்ளது.

நாடு முழுவதும் ஒரே வரி எப்படும் ஜிஎஸ்டி ஜூலை 1ஆம் தேதி முதல் அமலுக்கு வர உள்ளது. இதனால் மத்திய அரசு தீவிரமாக செயல்பட்டு வருகிறது. பல்வேறு பொருட்களுக்கு எத்தனை சதவீதம் வரி என்று மத்திய அரசு நிர்ணயித்துள்ளது. அது போல் 500 சேவைகளுக்கான வரிகளும் நிர்ணயிக்கப்பட்டுவிட்டன.

இந்நிலையில் இந்தியாவிலேயே அதிக வருவாய் தரும் கோவில்களில் ஒன்றான திருப்பதி ஏழுமலையான் கோவிலில் வழங்கப்படும் லட்டு, அதற்கான மூலப்பொருட்கள் ஆகியவற்றிற்கு ஜிஎஸ்டி வரி விதிக்கப்படும் என கூறப்பட்டிருந்தது. மேலும் அங்குள்ள விடுதிகளின் கட்டணம் அதிகரிக்கப்படும் என்றும் கூறப்பட்டது. ஆனால் திருப்பதி லட்டு மற்றும் மூலப்பொருட்களுக்கு ஜிஎஸ்டி வரியில் இருந்து விலக்கு அளிக்க வேண்டும் என்று ஆந்திர மாநில நிதி அமைச்சர் மத்திய அரசுக்கு கோரிக்கை விடுத்தார்.

இதனையடுத்து திருப்பதி லட்டு மற்றும் அதனை தயாரிக்க பயன்படுத்தப்படும் மூலப்பொருட்கள் ஆகியவற்றிற்கு ஜிஎஸ்டியில் இருந்து விலக்கு அளிப்பதாக மத்திய அரசு அறிவித்துள்ளது. இதனால் கோவில் நிர்வாகமும், பக்தர்களும் மகிழ்ச்சியில் உள்ளனர்.