ஈரோட்டில் ரூ. 7,600க்கு ஏலம் போன ஒரு எலுமிச்சை!!

ஈரோடு அருகே ஒரு எலுமிச்சை ரூ. 7,600க்கு ஏலம் போனது ஆச்சரியத்தை ஏற்படுத்தியுள்ளது.

ஈரோடு அருகே உள்ளது புதுஅண்ணமாலைபாளையம். இங்கு பழந்தின்னி கருப்பண்ணன் ஈஸ்வரன் கோயில் உள்ளது. இங்கு ஒவ்வொரு ஆண்டும் மகா சிவராத்திரி மிகவும் விமரிசையாக கொண்டாடுவது வழக்கம். இந்தாண்டும் அதுபோல் கொண்டாடப்பட்டது.

அப்போது சுவாமிக்கு பூக்கள், பழங்கள், எலுமிச்சை படைப்பது வழக்கம். மேலும், கோயிலுக்கு வரும் பக்தர்களுக்கு அன்னதானம் வழங்குவார்கள். சுவாமிக்கு அருகில் எலுமிச்சை மற்றும் வெள்ளி காசு, வெள்ளி மோதிரம் வைத்து வழிபடுவார்கள்.

அவ்வாறு வைத்து பூஜை செய்யப்பட்ட எலுமிச்சை ஒவ்வொரு ஆண்டும் ஏலம் விடப்படும். இந்தாண்டும் அதுபோல் ஏலம் விடப்பட்டது. அவ்வாறு ஏலம் விடப்பட்ட ஒரு எலுமிச்சையின் ஏல விலை ரூ. 2ல் துவங்கி இறுதியில் ரூ. 7,600க்கு ஏலம் விடப்பட்டது. வெள்ளிக் காசு ரூ. 12,000த்துக்கும், 5 கிராம் வெள்ளி மோதிரம் ரூ. 17,000த்துக்கும் ஏலம் போனது.

இவ்வாறு வாங்கிச் செல்லும் எலுமிச்சை மற்றும் வெள்ளிக் காசு, வெள்ளி மோதிரத்தை வீட்டில் வைத்து பூஜை செய்தால் வீட்டில் அனைத்து வளமும் பெருகும் என்பது நம்பிக்கை.