ராமேஸ்வரம் அம்பாளுக்கு மஞ்சள் நீராட்டு விழா!

ராமேஸ்வரம் ஸ்ரீராமநாத சுவாமி கோயிலில் ஆடித் திருவிழாவை முன்னிட்டு, ஸ்ரீபர்வதவர்த்தனி அம்பாளுக்கு இன்று மஞ்சள் நீராட்டு விழா நடைபெற்றது. இதில் ஏராளமான பக்தர்கள் கலந்து கொண்டனர்.

ராமேஸ்வரத்தில் அமைந்து உள்ளது ஸ்ரீராமநாத சுவாமி ஆலயம். வடக்கே காசியையும் தெற்கே ராமேஸ்வரத்தையும் இணைத்துச் சொல்வார்கள். ஸ்ரீராமபிரான் வழிபட்ட புண்ணிய க்ஷேத்திரம் இது.
இங்கே ஆடித்திருவிழா விமரிசையாக நடந்துவருகிறது. விழாவின் முக்கிய நிகழ்ச்சியான திருக்கல்யாண வைபவம் சிறப்புற நடைபெற்றது.

இதையடுத்து ஊஞ்சல் உத்ஸவம் நடைபெற்றது. சுவாமியும் அம்பாளும் சர்வ அலங்காரத்தில் ஊஞ்சலில் இருந்தபடி, திருக்காட்சி தந்தருளினார்கள். அதையொட்டி சுவாமிக்கும் அம்பாளுக்கும் கருவறையில் சிறப்பு பூஜைகள், வழிபாடுகள் நடைபெற்றன.

இன்று காலை அம்பாளுக்கு சிறப்பு பூஜைகள் நடைபெற்றன. இதன் பிறகு, அம்பாளுக்கு மஞ்சள் நீராட்டு விழா நடைபெற்றது. இதில் ஏராளமான பக்தர்கள் கலந்துகொண்டனர்.

மாலையில் சுவாமியும் அம்பாளும் ஏக சிம்மாசனத்தில் பவனி வரும் நிகழ்ச்சி நடைபெறும். அதையடுத்து நாளை 11ம் தேதி வியாழக்கிழமை அன்று சுவாமியும் அம்பாளும் வெள்ளி யானை வாகனத்தில் பட்டினப்பிரவேசம் வரும் நிகழ்ச்சி நடைபெறும்.