கேரளா, தமிழ்நாடு சிவ தரிசனங்கள்

கேரளா மாநிலம் வைக்கம் தலத்தில் உள்ள ஸ்ரீமகாதேவர் ஆலயத்தில், ஒவ்வொரு வேளையிலும் ஒவ்வொரு வடிவில் காட்சி தருகிறார் இறைவன்.

அதிகாலை துவங்கி 8 மணி வரை ஸ்ரீதட்சிணாமூர்த்தியாகக் காட்சி தருகிறார் ஸ்ரீமகாதேவர். உச்சிப்பொழுதில் ஆனந்த மூர்த்தியாக கிராதவேடுவ வடிவிலும், மாலை வேளையில் சாந்த வடிவினராக- பார்வதிதேவி, விநாயகர், முருகன் ஆகியோருடன் குடும்ப சகிதமாகவும் காட்சி தருகிறார். இவருக்கு உச்சிப்பொழுதில்தான் அபிஷேகங்கள் நடைபெறுகின்றன.

கோவைக்கு அருகில் உள்ள பேரூர்- ஸ்ரீபட்டீஸ்வரர் திருக் கோயிலில் சிவனாரின் ஊர்த்துவ தாண்டவ மூர்த்தம் அற்புதமான அமைப்புடன் உள்ளது. இந்தத் தாண்டவத்தை தரிசிக்கும் நிலையில் இருக்கும் பிரம்மன், ஐந்து தலைகளுடன் திகழ்கிறார்!

திருச்சிக்கு அருகில் உள்ள தலம் திருப்பாச்சிலாச்சிரமம். இங்குள்ள சிவாலயத்தில், பாம்பின் மீது திருநடனம் புரியும் ஸ்ரீநடராஜரை தரிசிக்கலாம்.

ராமேஸ்வரத்தில்... அனுமன் தனது வாலால் கட்டியிழுத்ததால் ஏற்பட்ட தழும்புடன் திகழும் சிவலிங்கத்தை தரிசிக்கலாம். இதே போன்று, ஆந்திர மாநிலத்தில் ராமகிரி எனும் இடத்தில் உள்ள சிவாலயத்திலும் அனுமனின் வால் பட்ட தழும்புடன் காட்சி தரும் சிவலிங்கம் உள்ளது.

மகாராஷ்டிரா மாநிலம் எல்லோரா குகைகளுக்கு அடுத்து உள்ள குஸ்மேசம் என்னும் ஊரில் உள்ள சிவலிங்கம் குஸ்ருமத்தால் ஆனது. ஈசனின் திருநாமம் குஸ்மேஸ்வரர்.

ஒரே லிங்கத்தில், 1008 லிங்கங்கள் அமைந்த சஹஸ்ர லிங்கத்தை, காஞ்சிபுரம் ஸ்ரீஏகாம்பரேஸ்வரர் ஆலயம், தென்காசி ஸ்ரீகாசிவிஸ்வநாதர் ஆலயம் மற்றும் சென்னை தாம்பரம் அருகில் உள்ள ஸ்ரீஸ்கந்தாஸ்ரமம் ஆகிய தலங்களில் தரிசிக்கலாம்.

வெள்ளியாலான சிவலிங்கத்துக்கு ‘ரஜத லிங்கம்‘ என்று பெயர். காஞ்சிபுரம், மயிலாப்பூர் போன்ற தலங்களில் உள்ள சிவாலயங்களில், குறிப்பிட்ட சில வேளைகளில் மட்டுமே ரஜத லிங்கத்தை தரிசனத்துக்காக வைப்பது வழக்கம். அப்போது ரஜத லிங்கத்தைக் கண்ணாரத் தரிசிக்கலாம்!