சொர்க்க துவாரம் மோட்ச துவாரம்!

வைணவத் திருத்தலங்களில், பெருமாள் பள்ளிகொண்டிருக்கும் கோலத்தைத் தரிசிப்போம். அதேபோல் ஸ்ரீகிருஷ்ணர் சயன கோலத்தில் அருளும் தலம், துவாரகை.

இந்தத் தலத்தில் கோயில்கொண்டிருக்கும் கண்ணனுக்கு துவாரகீசன் என்று திருநாமம். ஜகத் மந்திர் எனப்படும் இங்குள்ள கோயிலின் பிரதான வாயிலை, சொர்க்க துவாரம் என்பார்கள். எப்போதும் திறந்தே இருக்கும் இந்த வாயிலைக் கடந்தால், மோட்ச துவாரம். இதையும் தாண்டிச் சென்றால், ஸ்ரீகண்ணனின் திவ்ய தரிசனம் கிடைக்கும்.

அம்பலப்புழை கண்ணனுக்கு பால் பாயச நிவேதனம்!

கேரளாவில் ஆலப்புழை அருகே உள்ள அம்பலப் புழை ஸ்ரீகிருஷ்ணன் கோயிலில் கிழக்கு நோக்கி சேவை சாதிக்கிறார். ஸ்ரீகிருஷ்ணர். இவருக்கு பால் பாயசம் நைவேத்தியம் செய்து வழிபட, நினைத்தது நடக்கும் என்பது நம்பிக்கை. ஒரு லிட்டர் பாலில் இரண்டரை கிலோ சர்க்கரையைக் கலந்து, பால் சுண்டக் காய்ச்சப்பட்டு, கண்ணனுக்கு பால் பாயசம் தயாராவது விசேஷம்!