சாபம் நீக்கும் விநாயகர்... கல்யாண வரம் தரும் முருகன்!

சென்னை தாம்பரத்துக்கு அருகில் உள்ளது ஸ்ரீகோதண்டராம சுவாமி கோயில். இங்கே, கிழக்கு நோக்கிய சந்நிதியில் அமர்ந்த நிலையில் ஸ்ரீசசிமங்கள மஹாகணபதி அற்புதமாகக் காட்சி தருகிறார்.
ஒருமுறை விநாயகப் பெருமான், கயிலை சென்று சிவபெருமான்- பார்வதியை வணங்கி விட்டு, நவகோள்களின் பணிகளைப் பார்வையிடச் சென்றார். அப்போது அவர் சந்திரனைக் கடந்ததும், கணபதியின் வேழ முகத்தையும், பானை வயிற்றையும் கண்டு சந்திரன் சிரித்தானாம். இதனால் கோபம் கொண்ட கணபதி, சந்திரன் தேய்ந்து போகுமாறு சாபமிட்டாராம்.
இந்தச் சாபம் நீங்க கிருஷ்ணபட்ச சதுர்த்தியன்று சந்திரன், அவரை பூஜித்ததால், மனம் மகிழ்ந்த கணபதி, சாபம் நீங்க அருள் செய்தாராம். சந்திரனுக்கு நன்மை ஏற்பட்டது போல அனைவரும் நன்மை பெற இவர் இந்தத் திருத்தலத்தில் வீற்றிருந்து அருள் புரிகிறார்.
சசி என்றால் சந்திரன். மங்களம் என்றால் நன்மை. எனவே இவர், சசிமங்கள கணபதி எனப்படுகிறார். இங்கு விநாயக சதுர்த்தியன்று திருவீதி உலாவுடன் 3 நாட்கள் உற்ஸவம் நடைபெறுகிறது. மேலும் தினமும் மாலை வேளையிலும் சங்கட ஹர சதுர்த்தி நாளிலும், ஸ்ரீசசி மங்கள கணபதியை அருகம்புல் மாலை சார்த்தி வழிபடுகிறார்கள் பக்தர்கள்!
அண்ணனைப் போலவே அருள் வழங்கும் வழங்கும் வள்ளலெனக் காட்சி தருகிறார் ஸ்ரீமுத்துக்குமார சுவாமி. திருத்தணியில் உள்ள அதே கல்யாண கோலத்தில் வள்ளி- தேவசேனா சமேத ஸ்ரீசுப்ரமணிய சுவாமி காட்சி அளிக்கிறார். இங்கு கந்தசஷ்டி உற்சவமும், சூரசம்ஹாரமும் விமரிசையாகக் கொண்டாடப்படுகிறது.
பங்குனி உத்திரத்தன்று வள்ளி- தெய்வானை சமேத ஸ்ரீமுத்துக்குமார ஸ்வாமிக்கு நடைபெறும் கல்யாண உற்ஸவம் விமரிசையாகக் கொண்டாடப்படுகிறது. நேற்று ஆயிரக்கணக்கான பக்தர்கள் கலந்துகொள்ள, திருக்கல்யாண உத்ஸவம் சிறப்புறக் கொண்டாடப்பட்டது.
மாதந்தோறும் வருகிற கார்த்திகை நட்சத்திரத்தன்று ஸ்ரீமுத்துக்குமார சுவாமிக்கு விசேஷ அபிஷேகம் நடைபெறும். இவரை வணங்கினால், தடைப்பட்ட திருமணம் இனிதே நடந்தேறும் என்பது ஐதீகம்!