குரல் ஆண் போல இருப்பதாக விவாகரத்து நோட்டீஸ் அனுப்பிய கணவன்

மனைவியின் குரல் ஆண் போல இருப்பதாகவும் தாடி வைத்திருப்பதாவும் கூறி ஒருவர் விவாகரத்து நோட்டீஸ் அனுப்பியுள்ளார்.

குஜராத் மாநிலம் அகமதாபாத் குடும்ப நீதிமன்றத்தில் ஒருவர் தன் மனைவியிடமிருந்து விவாகரத்து கோரி மனுத்தாக்கல் செய்தார். அவர் தனது மனுவில் விவாகரத்துக்கான காரணங்களாக தன் மனைவி ஆண் குரலில் பேசுகிறார் என்றும் தாடி வளர்த்திருக்கிறார் என்றும் கூறியுள்ளார்.

மேலும், சம்பிரதாயத்துக்கு எதிரானது என்பதால் திருமணத்துக்கு முன் தான் அவரைப் பார்க்கவே இல்லை என்றும் அவர் குறிப்பிட்டுள்ளார். இதனை விசாரித்த நீதிமன்றம் அவர் கூறியிருக்கும் காரணங்களால் விவாகரத்து அளிக்க மறுத்து மனுவை தள்ளுபடி செய்துள்ளது.

இது குறித்து கருத்து தெரிவித்த அவரது மனைவி, “அவர் தன்னை வீட்டிலிருந்து எப்படியாவது துரத்திவிட வேண்டும் என்று பொய்யாக குற்றம்சாட்டுகிறார். முகத்தில் முடி வளர்வது ஹார்மோன் சமநிலை இல்லாததால். அதை சிகிச்சை மூலம் சரிசெய்துகொள்ளலாம்.” என்று கூறியுள்ளார்.

இதே போன்ற பல வழக்குகள் குடும்ப நீதிமன்றத்திற்கு தொடர்ந்து வருகின்றன. கடந்த ஜூன் மாதம் ஒருவர் இதே காரணங்களுக்காக விவாகரத்து கோரினார். அந்த மனுவும் தள்ளுபடி செய்யப்பட்டது.