ஆக்ஸ்போர்ட் ஆங்கில அகராதியில் சேரப்போகும் ”ஐயோ”, “ஹையா”...!

தென்னிந்திய மக்களால் பயன்படுத்தப்படும் ஐயோ மற்றும் ஹையா ஆகிய வார்த்தைகளை ஆக்ஸ்போர்ட் ஆங்கில அகராதியில் சேர்க்க அந்நிறுவனம் முடிவு செய்துள்ளது.

உலகளவில் தரமான ஆங்கில அகராதியாக கருதப்படும் ஆக்ஸ்போர்டு அகராதியானது, ஒவ்வொரு ஆண்டும் நான்கு முறை உலகளவில் அதிகம் பயன்படுத்தப்படும்,பிரபலமான வார்த்தைகளை தனது அகராதியில் சேர்த்து வருகிறது.சென்று ஆண்டு கூட செல்பி என்ற வார்த்தையை அந்நிறுவனம் சேர்த்தது.

இந்நிலையில் இந்த வருடத்திற்கான அறிவிப்பை வெளியிட்டுள்ள ஆக்ஸ்போர்டு நிறுவனம்,தென்னிந்திய மக்கள் அடிக்கடி உபயோகிக்கும் ’ ஐயோ’ மற்றும் ’ஹையா’ ஆகிய வார்த்தைகளை இந்த மாதம் சேர்க்க உள்ளதாக தெரிவித்துள்ளது.

தென்னிந்தியாவில் குறிப்பாக தமிழகத்தில் ஏமாற்றத்தைக் குறிக்கும் சொல்லாக ஐயோவும், ஆனந்தத்தை குறிக்கும் சொல்லாக ஹையாவும் பயன்படுத்தப்பட்டு வருகின்றன.இந்த இரண்டு வார்த்தைகளுக்கும் பொருள் அர்த்தம் கிடையாது என்றாலும், ’சும்மா’ என்ற வார்த்தையைப் போல் இந்த இரு வார்த்தைகளும் மக்களால் அடிக்கடி பயன்படுத்தப்பட்டு வருகின்றன.

இதனை கணக்கில் எடுத்துக் கொண்ட ஆக்ஸ்போர்டு நிறுவனம்,இந்த புதிய முடிவை எடுத்துள்ளது.இதன் மூலம் அமெரிக்காவில் இருப்பவர் கூட அதிர்ச்சியடைந்தால் ”ஐயோ போச்சே..” என புலம்பும் நிலை வரலாம்.