பிறந்த குழந்தையின் வாயில் 7 பற்கள்; அறுவை சிகிச்சை மூலம் நீக்கிய மருத்துவர்கள்!

காந்திநகர்: ஒருமாத குழந்தையின் வாயில் இருந்து 7 பற்களை மருத்துவர்கள் அகற்றினர்.

குஜராத் மாநிலம் அகமதாபாத் பகுதியைச் சேர்ந்த பெற்றோருக்கு ஆண் குழந்தை ஒன்று பிறந்துள்ளது. அதன் வாயில் பிறக்கும் போதே, 7 பற்கள் இருந்துள்ளன. அவை ஆடக் கூடியதாகவும், தாய்ப்பால் குடிக்கும் போது மிகவும் சிரமமாகவும் காணப்பட்டது.

இதனால் சிட்டி மருத்துவமனைக்கு சிகிச்சைக்காக குழந்தையை கொண்டு சென்றனர். அங்கு குழந்தை நல மருத்துவர் நிரவ் பெனானி மற்றும் குழந்தைகள் நல பல் மருத்துவர் மித் ரமட்ரி ஆகியோரின் ஆலோசனையை நாடினர்.

அவர்கள் குழந்தையின் நிலை சிக்கலான விஷயம் என்று கூறி, தொடர்ந்து கண்காணித்தனர். இதனைத் தொடர்ந்து அறுவை சிகிச்சைக்கு தயாராகினர். 15 நிமிடம் நடைபெற்று அறுவை சிகிச்சையில், 7 பற்களையும் நீக்கினர்.

இது மிகவும் அரிதான ஒன்று என மருத்துவர்கள் ஆச்சரியத்துடன் கூறினர். அறுவை சிகிச்சையின் போது, பற்கள் குழந்தையின் மூச்சுக் குழல் அல்லது உணவுக் குழலில் சிக்கிக் கொள்ள வாய்ப்பிருப்பதால் மிகவும் கவனத்துடன் மேற்கொண்டதாக குறிப்பிட்டனர். தற்போது குழந்தை மிகுந்த உடல்நலத்துடன் உள்ளது.

Gujarat: Doctors extract seven teeth from one-month-old's mouth.