ஒரே உடலில் இரு இதயங்கள்: உயிர் காக்கும் புதிய சிகிச்சை!

சென்னை: ஒரே உடலில் இரண்டு இதயங்களைப் பொருத்தி இதய மாற்று அறுவை சிகிச்சையை தவிர்க்கும் புதிய சிகிச்சை முறையை சென்னையைச் சேர்ந்த மருத்துவர்கள் கண்டுபிடித்துள்ளனர்.

இதய மாற்று அறுவை சிகிச்சை செய்துகொள்ள வேண்டிய பல நோயாளிகள் வேறு உறுப்புகளின் பாதிப்பினால் இதய மாற்று அறுவை சிகிச்சை செய்வது முடியாமல் போகிறது. அப்படிப்பட்ட நோயாளிகளுக்கு பலவீனமான இதயத்திற்கு உதவும் வகையில் இடது வெர்டிகுலர் கருவி பொருத்தப்படும். இந்த கருவியின் விலை சுமார் ஒரு கோடி வரை ஆகிறது.

ஆனால், இதனைத் தவிர்க்கும் விதமாக பலவீனமான இதயத்திற்கு உதவும் மற்றொரு இதயத்தைப் பொறுத்தும் புதிய அறுவை சிகிச்சையை சென்னையைச் சேர்ந்த தனியார் மருத்துவமனை மருத்துவர்கள் முயன்றுள்ளனர்.

இதற்காக, நோய்வாய்ப்பட்ட நாய் ஒன்றின் உடலில் இரண்டாவது இதயத்தைப் பொருத்தியுள்ளனர். நாயின் வயிற்றில் வைக்கப்பட்ட இரண்டாவது இதயம் அதன் இயற்கையான முதல் இதயத்திற்கு பக்கபலமாக செயல்பட்டிருக்கிறது. முதல் இதயம் தன் செயலிழந்த பிறகும் இரண்டாவது இதயம் 48 மணி நேரத்திற்கு இயங்கி நாயின் உயிரைக் காப்பாற்றியிருக்கிறது.



வயிற்றில் இரண்டாவது இதயத்தைப் பொருத்துவதால் அறுவை சிகிச்சையில் ஏற்படும் ஆபத்தும் குறைகிறது. இவ்வாறு இரண்டாவதாக பொறுத்தப்படும் இதயத்தின் ரத்த சுழற்சி செயல்திறன் குறைந்தபட்சம் 30 சதவீதம் இருக்க வேண்டும். அப்படி இல்லாதபோது அந்த இதயத்தை பொருத்துவதைத் தவிர்த்துவிடுவோம் என்று மருத்துவர்கள் தெரிவிக்கின்றனர். இது பற்றி மேலும் சோதனை நடத்தப்போவதாகவும் மருத்துவர்கள் கூறுகின்றனர்.