தீபாவளி ஸ்பெஷல்: தித்திக்கும் மைசூர்பாக்

தீபாவளி பலகாரங்களில் மைசூர் பாக்குக்கும் தனிச்சிறப்புண்டு. கர்நாடகாவில் மிகவும் பிரபலமான இணைப்பு பலகாரம் மைசூர் பாக். நாவூறும், வாயில் போட்டால் மென்மையாக கரையும் மைசூர்பாக் செய்வது பற்றி பார்க்கலாம்.

தேவையான பொருள்கள்:

கடலை மாவு – 1 கப்

சர்க்கரை – 2 1/2 கப்

நெய் – 2 1/2 கப்

செய்முறை:

கடலை மாவை நன்கு சலித்து, மிக லேசாக 2, 3 நிமிடங்கள் மட்டும் வறட்டு வாணலியில் வறுத்துக் கொள்ளவும். தூய நெய்யை லேசான தீயில் நன்றாக உருக்கி வைத்துக் கொள்ளவும். சர்க்கரையை சிறிது நீர் சேர்த்து, அடுப்பில் சிம்மில் வைத்து, முழுவதையும் கரைய விடவும். கரைவதற்கு முன் சூடு அதிகமானல் பாகு ஆகிவிடலாம். அதனால் தீயை மிகக் குறைந்த அளவிலேயே வைத்து முழுமையாகக் கரைக்க வேண்டும்.

சர்க்கரை கரைந்ததும், கடலைமாவை சிறிது சிறிதாகச் சேர்த்துக் கட்டிகளில்லாமல் கலந்து கொள்ளவும். சலித்து வறுத்திருப்பதால் பெரிய பிரச்சினை ஆகாமல் கலந்துவிடும். மாவு கலந்து கொதிக்கத் தொடங்கியதும், நெய்யை 4,5 பாகங்களாக தவணை முறையில் இறுக இறுக சேர்த்துக் கிளறவும்.

கடைசியில் எல்லா நெய்யும் சேர்த்தபின், கிளறிக்கொண்டே இருக்கையில் நன்கு கெட்டியாக ஒட்டாமல் வரும்போது, இறக்கி நெய் தடவிய தட்டில் கொட்டி ஒரு கரண்டியால் சீராகப் பரத்தி ஓரங்களை அழுத்தி விடவும். சிறிது நெய் தடவிய தட்டையான கரண்டியால் தடவினால் மேல்பாகம் வழவழப்பாகிவிடும்.

நன்கு ஆறியதும் கத்தியால் கீறி வில்லைகள் போடலாம். கடைகளில் கிடைப்பதுபோல் நீள் சதுரமாகவோ, வழக்கமான சதுரங்களாகவோ தான் செய்ய வேண்டும் என்றில்லை. பிள்ளையாருக்கான சின்ன மோதக அச்சில் கூட வார்த்து எடுக்கலாம். எல்லாவற்றிற்கும் எவ்வளவு நேரமானலும் கலவை வளைந்து கொடுக்கும். வாயில் கரையும்.

குறிப்பு: சுத்தமான நெய்யில் மட்டும் தான் செய்ய வேண்டும். மைசூர்பாகிற்க்குச் செய்வது போல் டால்டா உபயோகிக்கக் கூடாது. அதிகம் நெய்க்கு பயந்தவர்கள், 2 பங்கு மட்டும் நெய் சேர்த்தும் செய்யலாம். பெரிய வித்தியாசம் தெரியாது.