டொனால்டு வெற்றி முகம்: சரியும் பங்குச் சந்தை

அமெரிக்க அதிபருக்கான தேர்தலில் இதுவரை நடந்த வாக்கு எண்ணிக்கையில் தொடர்ந்து குடியரசுக் கட்சி வேட்பாளர் டொனால்டு டிரம்ப் முன்னிலை வகித்து வருகிறார்.

இதையடுத்து உலக அளவில் பங்குச் சந்தை வீழ்ச்சி அடைந்து வருகிறது. வால் ஸ்டிரீட், டோ ஜோன்ஸ் இண்டஸ்டிரியல் ஆகியவை 400 புள்ளிகளுக்கும் அதிகமாக சரிந்துள்ளது. அதாவது 2 சதவீதம் சரிந்துள்ளது. 500 பங்குகளைக் கொண்ட Standard & Poor சுமார் 63 புள்ளிகள் சரிவை சந்தித்துள்ளது. நாஸ்டாக் 100 புள்ளிகளுக்கும் அதிகமான சரிவைக் கண்டுள்ளது.

அதிபர் தேர்தலில் கருத்துக் கணிப்புகளை எல்லாம் உடைத்துக் கொண்டு டொனால்டு முன்னிலையில் இருப்பது ஆசிய சந்தைகளையும் ஆட்டுவித்துள்ளது. தொடர்ந்து ஆசிய சந்தைகளும் சரிவை சந்தித்து வருகிறது. அமெரிக்க டாலரும் சரிவை நோக்கி சென்று கொண்டுள்ளது. ஆனால், தங்கம் விலை அதிகரித்து காணப்படுகிறது. அதே சமயம் ஜப்பானின் Yen மதிப்பு அதிகரித்து காணப்படுகிறது.

அமெரிக்காவில் தேர்தலை முன்னிட்டு பங்குச் சந்தை சரிவை சந்தித்து வருகிறது என்றால், இந்தியாவில் மோடியின் அதிரடி அறிவிப்பால், பங்குச் சந்தை வீழ்ச்சியை சந்தித்து வருகிறது. அமெரிக்கத் தேர்தலும் ஒரு காரணமாக பார்க்கப்படுகிறது.