ஆசிய விளையாட்டு; நிறைவு விழாவில் இந்திய கொடியை ஏந்திச் செல்லும் ராணி ராம்பால்!

ஜகர்த்தா: இந்திய பெண்கள் ஹாக்கி அணியின் கேப்டன் ராணி ராம்பால், ஆசிய விளையாட்டு போட்டி நிறைவு விழாவில் இந்திய கொடியை ஏந்திச் செல்கிறார்.

18வது ஆசிய விளையாட்டுப் போட்டிகள் இந்தோனேஷியாவில் நடைபெற்றது. இதில் இந்தியாவைச் சேர்ந்த ஏராளமான வீரர், வீராங்கனைகள் பங்கேற்றனர். இன்றுடன் விளையாட்டுப் போட்டிகள் நிறைவடைந்த நிலையில், நாளை நிறைவு விழா நடைபெறுகிறது.

இந்தியா 15 தங்கம், 24 வெள்ளி, 30 வெண்கலப் பதக்கங்களை வென்று சிறப்பான பங்காற்றியுள்ளது. ஒட்டுமொத்தமாக 69 பதக்கங்களை பெற்றுள்ளனர். இந்நிலையில் இந்திய ஒலிம்பிக் கூட்டமைப்பின் தலைவர் நரிந்தர் பத்ரா கூறுகையில், நாளை நடைபெறும் நிறைவு விழாவில் இந்திய மகளிர் ஹாக்கி அணி கேப்டன் ராணி இந்திய கொடியை ஏந்திச் செல்வார் என்று தெரிவித்தார்.

உலக ஹாக்கி சம்மேளனத்தின் தலைவராகவும் பத்ரா இருப்பது குறிப்பிடத்தக்கது. 18வது ஆசிய விளையாட்டுப் போட்டியின் தொடக்க விழாவில் ஈட்டி எறியும் வீரர் நீரஜ் சோப்ரா இந்திய கொடியை ஏந்திச் சென்றார். இவர் சிறப்பாக விளையாடி, இந்தியாவிற்கு தங்கப் பதக்கம் ஈட்டித் தந்தது குறிப்பிடத்தக்கது. ராணி தலைமையிலான இந்திய மகளிர் ஹாக்கி அணி, வெள்ளிப் பதக்கம் வென்றது.

இவர்கள் கடந்த 20 ஆண்டுகளில் முதல் முறையாக ஆசிய விளையாட்டு இறுதிக்கு முன்னேறினர். ஜப்பானுக்கு எதிரான போட்டியில் 2 - 1 என இந்தியா தோல்வி அடைந்தது. ஆசிய விளையாட்டுப் போட்டியில் பங்கேற்கச் சென்ற 550க்கும் மேற்பட்ட இந்திய வீரர்கள், தங்கள் போட்டிகள் நிறைவடைந்த பின் நாடு திரும்பினர். மீதமுள்ளவர்களில் இருந்து நிறைவு விழாவில் கொடி ஏந்தும் நபர் தேர்வு செய்யப்பட்டுள்ளார்.

Asian Games Rani Rampal to be India's flag-bearer at closing ceremony.