400 மீ ஓட்டப்பந்தயத்தில் வெள்ளிப் பதக்கம் வென்றார் இந்தியாவின் முகமது அனஸ்!!

ஜகார்தா: இந்தோனேசியாவில் நடைபெற்று வரும் ஆசியப் போட்டியில், இந்தியாவைச் சேர்ந்த முகமது அனஸ், 400மீ ஓட்டப்பந்தயத்தில் வெள்ளிப் பதக்கம் வென்று சாதனைப் படைத்துள்ளார்.

இந்தோனேஷியாவின் தலைநகரான ஜகார்த்தாவில் 18வது ஆசிய விளையாட்டு போட்டிகள் நடைபெற்று வருகின்றன. இதில் ஆசியாவின் ஒலிம்பிக் கவுன்சிலில் இடம்பெற்றுள்ள இந்தியா, இலங்கை, சீனா, பாகிஸ்தான், தென் கொரியா உட்பட 45 நாடுகள் பங்கேற்றுள்ளன.

இந்தியாவைப் பொறுத்தவரையில், சதீஷ் சிவலிங்கம், நீரஜ் சோப்ரா, சாய்னா நேவால் உள்ளிட்ட 542 விளையாட்டு வீரர்கள் இந்த ஆசிய விளையாட்டுப் போட்டியில் பங்கேற்றுள்ளனர்.

இந்நிலையில், இன்று நடைபெற்ற ஆண்களுக்கான 400 மீ ஓட்டப்பந்தயத்தில் இந்தியாவின்தடகள வீரர் முகமது அனஸ், பந்தய தூரத்தை 45.69 விநாடிகளில் கடந்து வெள்ளிப் பதக்கம் வென்றுள்ளார். அவரைப் போல, பெண்கள் 400 மீ ஓட்டப்பந்தயத்தில், இந்தியாவின் ஹிமா தாஸ், 50.79 விநாடிகளில் பந்தயத் தூரத்தைக் கடந்து வெள்ளிப் பதக்கம் வென்றார்.

இதன் மூலம், இந்தியா 7 தங்கம், 9 வெள்ளி மற்றும் 19 வெண்கலப் பதக்கங்களுடன் பதக்கப் பட்டியலில் 9 வது இடத்தில் உள்ளது.