‘ஃபார்முலா-1’ பிரிட்டன் கிராண்ட் பிரிக்ஸ் : லீவிஸ் ஹாமில்டன் அசத்தல் வெற்றி...!

உலகின் பல்வேறு நாடுகளில் ஆண்டுதோறும் ஃபார்முலா-1 கார்பந்தயம் நடப்பது வழக்கம். இந்த ஆண்டுக்கான 70வது தொடர் மொத்தம் 21 சுற்றுகளாக நடக்கிறது. இதன் 10வது சுற்றுக்கான ஃபைனல் போட்டி பிரிட்டனில் நடந்தது.

சீறிப்பாய்ந்த ஹாமில்டன்.....
இதில் மெர்சிடஸ் அணியின் பிரிட்டன் வீரர் லீவிஸ் ஹாமில்டன் முதலிடம் பிடித்தார். மொத்தமாக 52 சுற்றுகள் கொண்ட இந்த போட்டியில் ஹாமில்டன், பந்தய எல்லையை 1.43.28.437 நிமிடத்தில் கடந்து முதலிடம் பிடித்தார்.

போதாஸ் இரண்டாவது இடம்:
இவரைவிட கூடுதலாக 24.928 வினாடிகள் எடுத்துக்கொண்ட மற்றொரு மெர்சிடஸ் வீரர் வால்டேரி போதாஸ் இரண்டாவது இடம் பிடித்தார். பெராரி வீரர் சார்லஸ் லெக்லர்க் (+30.117 நிமிடங்கள்) மூன்றாவது இடம் பிடித்தார்.


6வது வெற்றி:
இந்த வெற்றியின் மூலம் ஹாமில்டன் தனது சொந்த மண்ணில் நடக்கும் ‘ஃபார்முலா -1’ கார்பந்தயத்தில் 6வது முறையாக வெற்றி பெற்று அசத்தினார். தவிர, இவர் தனது 52வது சுற்றை அதிவேகமாக கடந்து அசத்தினார்.


வெட்டல் விபத்து:
பெராரி அணியின் நட்சத்திர வீரரான ஜெர்மனியின் செபாஸ்டியன் வெட்டல், வெர்ஸ்டாபன் காருடன் விபத்து ஏற்படுத்தியதற்காக அவருக்கு 10 வினாடிகள் அபராதம் விதிக்கப்பட்டது. இதையடுத்து இவர் 16வது இடத்துக்கு தள்ளப்பட்டார்.


முதல் வீரர்:
இந்த வெற்றியின் மூலம், பிரிட்டன் கிராண்ட் பிரிக்ஸ் பந்தயத்தில் ஆறு முறை வென்ற முதல் வீரர் என்ற வரலாறு படைத்தார் ஹாமில்டன். இவர் ஜிம் கிளார்க், ஆலன் பிராஸ்ட்டை பின்னுக்கு தள்ளினார்.

நம்பர்-1 ஹாமில்டன்.....
இந்த வெற்றியின் மூலம் ஹாமில்டனுக்கு 25 புள்ளிகள் கிடைத்தது. இதையடுத்து இந்த ஆண்டுக்கான தொடரில் மொத்தமாக 223 புள்ளிகள் பெற்ற சாம்பியன்ஷிப் லீவிஸ் ஹாமில்டன் வீரர்கள் பட்டியலில் ‘நம்பர்-1’ இடத்தில் நீடிக்கிறார்.