ரஹானே... சதம்... தவறவிட்ட விஹாரி ... : வெஸ்ட் இண்டீசுக்கு இமாலய இலக்கு!

கரீபிய தீவுக்கு சுற்றுப்பயணம் சென்றுள்ள இந்திய கிரிக்கெட் அணி, 3 டி-20, 3 ஒருநாள், போட்டிகள் கொண்ட தொடரில் பங்கேற்றது. டி-20 தொடரை 3-0 என முழுமையாக இந்திய அணி கைப்பற்றியது. தொடர்ந்து நடந்த ஒருநாள் தொடரையும் இந்திய அணி 2-0 என வென்றது.

இந்நிலையில் இந்தியா, வெஸ்ட் இண்டீஸ் அணிகள் 2 டெஸ்ட் போட்டிகள் கொண்ட தொடரில் பங்கேற்கிறது. இரு அணிகள் மோதும் முதல் டெஸ்ட் போட்டி ஆண்டிகுவாவில் நடக்கிறது. இதில் முதல் இன்னிங்சில் இந்திய அணி 297 ரன்கள், வெஸ்ட் இண்டீஸ் 222 ரன்கள் எடுத்தது.

வலுவான முன்னிலை:
மூன்றாவது நாள் ஆட்டநேர முடிவில், இந்திய அணி இரண்டாவது இன்னிங்சில் 3 விக்கெட்டுக்கு 185 ரன்கள் எடுத்து 260 ரன்கள் என்ற வலுவான முன்னிலை பெற்றுள்ளது. கோலி (51), ரஹானே (53) அவுட்டாகமல் இருந்தனர்.


கோலி ஏமாற்றம்:
நான்காவது நாள் ஆட்டத்தில் இரண்டாவது இன்னிங்சை தொடர்ந்த இந்திய அணிக்கு கேப்டன் கோலி (51) சேஸ் சுழலில் சிக்கினார். அடுத்து ரஹானேவுடன் ஜோடி சேர்ந்த விஹாரி, நிதானமான ஆட்டத்தை வெளிப்படுத்தினார்.


வெஸ்ட் இண்டீஸ் பந்துவீச்சை சுலபமாக சமாளித்த இருவரும் சீரான இடைவேளையில் பவுண்டரிகள் விளாசினர். ரஹானே (102) சதம் அடித்து அவுட்டானார். விஹாரி (93) சதம் அடிக்கும் வாய்ப்பை தவறவிட்டார். இந்திய அணி இரண்டாவது இன்னிங்சில் 7 விக்கெட்டுக்கு 343 ரன்கள் எடுத்து டிக்ளேர் செய்தது. இதன் மூலம் வெஸ்ட் இண்டீஸ் அணிக்கு 419 ரன்கள் என்ற இமாலய இலக்கை நிர்ணயித்தது.