சென்னை அணிக்கு அடுத்த சோதனை, சரிந்தது பிராவோ விக்கெட்!

சென்னை சூப்பர் கிங்ஸ் அணிக்கு இந்த சீசனில் இன்னும் நான்கு போட்டிகள் எஞ்சியுள்ள நிலையில், காயம் காரணமாக அவதிப்பட்டு வந்த ஆல்-ரவுண்டர் டுவைன் பிராவோ விரைவில் அவரின் சொந்த நாட்டிற்குச் செல்வார் எனச் சென்னை அணியின் தலைமை நிர்வாக அதிகாரி காசி விஸ்வநாதன் அறிவித்துள்ளார்.

சென்னை டெல்லி அணிகள் இடையேயான ஐபிஎல் லீக் போட்டியின்போது, டுவைன் பிராவோவிற்கு இடுப்பு பகுதியில் காயம் ஏற்பட்டது. இந்த காயம் காரணமாக, போட்டி நடந்து கொண்டிருந்தபோதே பிராவோ பெவிலியன் திரும்பினார்.

இதன் காரணமாக இறுதி ஓவரை பிராவோவால் வீச இயலவில்லை. இதன் காரணமாக ரவிந்திர ஜடேஜா குறிப்பிட்ட ஓவரை வீசினார். ஜடஜே வீசிய ஓவர் சென்னை அணியை இக்கட்டான நிலைக்குக் கொண்டு சென்றது. அதைத் தொடர்ந்து நடந்த போட்டிகளில் எதிலும் பிராவோ களமிறங்கவில்லை. எதிர்வரும் போட்டிகளில் நிச்சயம் அவர் களமிறங்குவார் எனக் கருதப்பட்ட நிலையில், அவர் நாடு திரும்பவுள்ளதாக இப்போது அதிகாரப்பூர்வ தகவல் வெளியாகியுள்ளது.

இதுகுறித்து சென்னை சூப்பர் கிங்ஸ் அணியின் தலைமை நிர்வாகி காசி விஸ்வநாதன் கூறுகையில், “பிராவோவிற்கு இடுப்பு பகுதியில் காயம் ஏற்பட்டுள்ளது. இதன் காரணமாக இனி வரும் போட்டிகளில் அவரால் பங்கேற்க இயலாது. இன்னும் இரண்டு நாட்களில் அவர் சொந்த நாட்டிற்குப் புறப்படுவார்” எனத் தெரிவித்தார்.

ஐபிஎல் 2020: டாப் 5 சொதப்பல் மன்னர்கள் இவர்கள்தான்!

தற்போது, பிராவோ விலகியுள்ளதால் அவருக்குப் பதில் யார் களமிறங்குவார் எனக் கேள்வி எழுந்துள்ளது. சென்னை அணியில் உள்ள இம்ரான் தஹிர் இத்தொடரில் ஒரு போட்டியில் கூட களமிறக்கப்படவில்லை. கடந்த சீசனில் அதிக விக்கெட்களை கைப்பற்றியதற்காக ஊதா நிறை தொப்பியைப் பெற்றவர் தஹிர்.

பிராவோவின் இடத்தை இம்ரான் தஹிர் நிரப்ப வாய்ப்பிருப்பதாகக் கருதப்பட்டாலும், கடந்த போட்டியில் ஜோஸ் ஹேசில்வுட் சிறப்பாகப் பந்துவீசினார். இதனால், இம்ரான் தஹிருக்கு வாய்ப்புகள் கிடைப்பதில் சந்தேகம் எழுந்துள்ளது.