DC vs RCB: ஸ்டோய்னிஸ் - ரபடா கூட்டணியால் புள்ளிப்பட்டியலில் முதலிடம் பிடித்த டெல்லி!

டெல்லி கேபிடல்ஸ் அணியின் நடுவரிசை பேட்ஸ்மேன் மார்க்கஸ் ஸ்டோய்னிஸ் கடைசி நேரத்தில் அதிரடி காட்டி 24 பந்துகளில் அரை சதம் கடந்ததாலும், காகிசோ ரபடா தனது மிரட்டல் பந்து வீச்சு காரணமாக 4 விக்கெட்களை கைப்பற்றியதன் காரணமாகவும், டெல்லி கேபிடல்ஸ் அணி அணி 59 ரன்கள் வித்தியாசத்தில் அபார வெற்றிபெற்றது. டெல்லி கேபிடல்ஸ் அணி தொடக்கத்தில் ஓரளவுக்குச் சிறப்பாக சோபித்தாலும், மிடில் ஓவர்களில் அடுத்தடுத்து மூன்று விக்கெட்களை பறிகொடுத்தது. இதனால், ஷிம்ரன் ஹெட்மயருக்கு முன்பு, மார்க்கஸ் ஸ்டோய்னிஸ் களமிறக்கப்பட்டார். ரன் ரேட் விகிதம் எட்டுக்கும் குறைவாகச் சென்றது.

மொயின் அலி, யுஜ்வேந்திர சஹல் இருவரும் மிடில் ஓவர்களில் சிறப்பாகப் பந்து வீசியதால் பேட்ஸ்மேன்கள் திணறினர். ரன் ரேட் இறங்குமுகத்தில் சென்றபோது, மார்க்கஸ் ஸ்டோய்னிஸ், மொயின் அலி வீசிய 14ஆவது ஓவரை டாக்கெட் செய்து ஒரு சிக்ஸர், ஒரு பவுண்டரி அடித்தார். அதனைத் தொடர்ந்து தனது ரன் வேட்டையை ஆரம்பித்தார். ஸ்டோய்னிஸ் 30 ரன்கள் எடுத்திருந்த போது, யுஜ்வேந்திர சஹல் கேட்ச்சை தவறவிட்டார்.

அதேபோல், 46 ரன்களில் இருந்தபோது ரன்-அவுட்டில் இருந்து தப்பித்தார். இதனால், 26 பந்துகளில் 53 ரன்கள் சேர்த்து டெல்லி அணியின் ஸ்கோரை கிடுகிடுவென உயர்த்தினார். 197 ரன்கள் எடுத்தால் வெற்றி என்ற இமாலய இலக்கை நோக்கிக் களமிறங்கிய ராயல் சேலஞ்சர்ஸ் பெங்களூர் அணியை பௌலர்கள் பதம் பார்த்தனர். தேவ்தத் படிக்கல் ஆஃப் ஸ்பின் ஆட திணறுவார் எனத் தெரிந்து ரவிச்சந்திரன் அஸ்வினை பவர் பிளே ஓவருக்குள் கொண்டுவந்து, படிக்கல்லை வீழ்த்தினர்.

59 ரன்கள் வித்தியாசத்தில் ஆர்சிபியை அபாரமாக வென்ற டெல்லி அணி!

அடுத்து அக்‌ஷர் படேல், காகிசோ ரபாடா இணைந்து முதல் வரிசை, நடு வரிசை பேட்ஸ்மேன்களை பெவிலியனுக்கு அனுப்பினர். ரபடா வழக்கம்போல், தனது மிரட்டல் பந்து வீச்சை வெளிப்படுத்தி 4 ஓவர்கள் வீசி 24 ரன்கள் மட்டும் விட்டுக்கொடுத்து 4 விக்கெட்களை வீழ்த்தினார். அதேபோல், அக்‌ஷர் படேல் 4 ஓவர்களில் 18 ரன்களை மட்டும் விட்டுக்கொடுத்து 2 விக்கெட்களை கைப்பற்றினார்.

இதன் காரணமாக, ராயல் சேலஞ்சர்ஸ் பெங்களூர் அணி 9 விக்கெட்கள் இழப்பிற்கு 137 ரன்கள் மட்டும் எடுத்து 59 ரன்கள் வித்தியாசத்தில் தோல்வியைச் சந்தித்தது.