IPL 2023: 'அடிச்சு சொல்றேன்'...அந்த இளம் வீரர் நிச்சயம் இந்தியாவுக்காக விளையாடுவாரு: ரவி சாஸ்திரி பாராட்டு!

ஐபிஎல் 2023 தொடர் தொடர் தற்போது விறுவிறுப்பாக நடைபெற்று வருகிறது.

இத்தொடரில் ஹைதராபாத்தை சேர்ந்த திலக் வர்மா மும்பை இந்தியன்ஸ் அணிக்காக தொடர்ந்து சிறப்பான ஆட்டத்தை வெளிப்படுத்தி வருகிறார். ராயல் சேலஞ்சர்ஸ் பெங்களூர் அணிக்கு எதிராக 46 பந்துகளில் 4 சிக்ஸர்கள், 9 பவுண்டரிகள் உட்பட 84 ரன்களை எடுத்து கடைசிவரை ஆட்டமிழக்காமல் களத்தில் இருந்தார்.

சென்னை சூப்பர் கிங்ஸுக்கு எதிராக கூட 22 ரன்களை அடித்திருந்தார். மேலும், டெல்லி கேபிடல்ஸுக்கு எதிரான ஆட்டத்தில் 41 ரன்களை சேர்த்து அசத்தியதால், மும்பை இந்தியன்ஸ் அணி முதல் வெற்றியைப் பெற்றது. இப்படி திலக் வர்மா 3 போட்டிகளில் 147 ரன்களை குவித்திருக்கிறார். இதனால், திலக் வர்மா எதிர்காலத்தில் மும்பை அணியின் நட்சத்திர வீரராக திகழ்வார் என எதிர்பார்க்கப்படுகிறது.

ரவி சாஸ்திரி பேட்டி:

இந்நிலையில் தற்போது பத்திரிகை ஒன்றுக்குப் பேட்டிகொடுத்துள்ள இந்திய அணி முன்னாள் தலைமை பயிற்சியாளர் ரவி சாஸ்திரி, திலக் வர்மா குறித்து புகழ்ந்து பேசியுள்ளார். அதில், ''திலக் வர்மா தற்போதே இந்திய வீரராகிவிட்டார். அடுத்த 6 அல்லது 8 மாதத்தில் அவர் இந்திய அணிக்காக விடுவார் என நம்புகிறேன். அப்படி விளையாடவில்லை என்றால், அது எனக்கு ஆச்சரியமாகத்தான் இருக்கும்'' எனக் கூறினார்.

மேலும் பேசிய அவர், ''திலக் வர்மாவுக்கு 20 வயதுதான் ஆகிறது. ஆனால், மூத்த வீரரை போல போட்டியை புரிந்துகொண்டு சிறப்பாக விளையாடுகிறார். நிச்சயம் அவர் இந்திய அணிக்காக விளையாட வேண்டும். இதனால், இந்திய அணியின் மிடில் வரிசை பலமிக்கதாக மாறும்'' எனத் தெரிவித்தார்.

திலக் வர்மா ரெக்கார்ட்:

மும்பை இந்தியன்ஸ் அணி திலக் வர்மாவை 1.70 கோடிக்கு வாங்கியது. இவர் 14 போட்டிகளில் 36.09 சராசரியுடன் 397 ரன்களை குவித்துள்ளார். கடந்த மூன்று போட்டிகளில் 73.5 சராசரியுடன் 147 ரன்களை சேர்த்திருக்கிறார் என்பது குறிப்பிடத்தக்கது.