​PBKS vs GT: ‘என்னா அடி’...லிவிங்ஸ்டன், ராகுல் சஹார் மெர்சல் பேட்டிங்: பஞ்சாப் ரன் குவிப்பு!

ஐபிஎல் 15ஆவது சீசனின் இன்றைய லீக் போட்டியில் பஞ்சாப் கிங்ஸ், குஜராத் டைடன்ஸ் அணிகள் மோதின. இதில் டாஸ் வென்ற குஜராத் அணி முதலில் பந்துவீச்சைத் தேர்வு செய்தது.

பஞ்சாப் இன்னிங்ஸ்:

முதலில் களமிறங்கிய பஞ்சாப் அணியில் வழக்கம்போல கேப்டன் மயங்க் அகர்வால் 5 (9) சொற்ப ரன்களுக்கு ஆட்டமிழந்தார். இதனைத் தொடர்ந்து ஜானி பேர்ஸ்டோவும் 8 (8) பெரிய ஸ்கோர் அடிக்கவில்லை. இதனால், பஞ்சாப் அணிக்கு நெருக்கடி ஏற்பட்ட நிலையில் ஷிகர் தவன், லிவிங்ஸ்டன் இருவரும் பார்ட்னர்ஷிப் அமைத்து ரன்களை சேர்க்க ஆரம்பித்தனர். லிவிங்ஸ்டன் அதிரடி காட்ட, தவன் நிதானமாக விளையாடி வந்தார்.

நீல்கண்டே அபாரம்:

இந்நிலையில் தவன் 35 (30) ரன்கள் சேர்த்திருந்தபோது ரஷித் கான் பந்துவீச்சில் ஆட்டமிழந்து நடையைக் கட்டினார். தொடர்ந்து லிவிங்ஸ்டனுடன் ஜிதேஷ் ஷர்மா பார்ட்னர்ஷிப் அமைத்தார். இருவரும் அதிரடியாக விளையாடினர். இந்நிலையில் 13ஆவது ஓவரில் இளம் பௌலர் தர்ஷன் நீல்கண்டே வீசிய பந்தில் ஜிதேஷ் 23 (11) ஆட்டமிழந்தார். இதனைத் தொடர்ந்து அடுத்த பந்திலேயே ஓடியன் ஸ்மித்தும் 0 (1) ஆட்டமிழந்ததால், பரபரப்பு ஏற்பட்டது. இதனால், நீல்கண்டே ஹாட்ரிக் விக்கெட் எடுக்கும் வாய்ப்பு உருவான நிலையில் லிவிங்ஸ்டன் இரண்டு பவுண்டரிகளை விளாசி அசத்தினார்.

ராகுல் சஹார் மாயாஜாலம்:

தொடர்ந்து நடைபெற்ற ஆட்டத்தில், ரஷித் கான் வீசிய 15ஆவது ஓவரின் 3ஆவது பந்தில் லிவிங்ஸ்டனும் 64 (27), 5ஆவது பந்தில் ஷாருக்கானும் 15 (8) ஆட்டமிழந்தனர். இதனால், பஞ்சாப் அணியின் ஸ்கோர் வேகத்தில் தொய்வு ஏற்பட்டது. ரபாடா (1), வைபவ் அரோரா (2) ஆகியோர் சிறப்பாக விளையாடவில்லை. இறுதியில் கடைசி இரண்டு ஓவர்களில் ராகுல் சஹார் 22 (14), அர்ஷ்தீப் சிங் 10 (5) ஆகியோர் சிறப்பாக விளையாடினார்கள். இதனால், பஞ்சாப் அணி 20 ஓவர்கள் முடிவில் 189/9 ரன்களை குவித்து அசத்தியது.

ரஷித் கான் 4 ஓவர்களில் 22 ரன்களை மட்டும் விட்டுக்கொடுத்து 3 விக்கெட்களை கைப்பற்றி அசத்தினார்.