RCB vs LSG: 'தோல்விக்கு காரணம்'...இந்த 2 பேர்தான்: இப்டி விளையாடுனா எப்டி? டூ பிளஸி அதிருப்தி!

ஐபிஎல் 16ஆவது சீசனின் 15ஆவது லீக் போட்டியில் ராயல் சேலஞ்சர்ஸ் பெங்களூர், லக்னோ சூப்பர் ஜெய்ண்ட்ஸ் அணிகள் மோதின.

இப்போட்டியில் டாஸ் வென்ற லக்னோ அணி முதலில் பந்துவீச்சைத் தேர்வு செய்தது.

ஆர்சிபி இன்னிங்ஸ்:

முதலில் களமிறங்கிய ஆர்சிபி அணியில் விராட் கோலி 61 (44), டூ பிளஸி 79 (46), கிளென் மேக்ஸ்வெல் 59 (29) ஆகியோர் சிறப்பாக விளையாடினார்கள். இதனால், ஆர்சிபி அணி 20 ஓவர்கள் முடிவில் 212/2 ரன்களை குவித்து அசத்தியது.

லக்னோ இன்னிங்ஸ்:

இலக்கை துரத்திக் களமிறங்கிய லக்னோ அணியில் டாப் ஆர்டர் பேட்டர்கள் சிறப்பாக செயல்படவில்லை. இதனைத் தொடர்ந்து மார்க்கஸ் ஸ்டாய்னிஸ் 65 (30), நிகோலஸ் பூரன் 62 (19), ஆயுஸ் படோனி 30 (24) ஆகியோர் சிறப்பாக செயல்பட்டனர்.

இறுதியில் 19 ஓவர்கள் 208/7 என லக்னோ அணி இருந்தது. அப்போது கடைசி ஓவரில் ஹர்ஷல் படேல் அபாரமாக பந்துவீசி மார்க் உட் 1 (2), உனாத்கட் 9 (7) ஆகியோர் ஆட்டமிழந்தனர். இதனால், கடைசிப் பந்தில் ஒரு ரன் தேவைப்பட்டது. ஒரு விக்கெட்தான் கையில் இருந்தது. இறுதியில் ஆவேஷ் கான் ஒரு ரன் எடுத்ததால், லக்னோ அணி 20 ஓவர்கள் முடிவில் 213/9 ரன்களை சேர்த்து, ஒரு விக்கெட் வித்தியாசத்தில் வெற்றியைப் பெற்றது.

டூ பிளஸி பேட்டி:

இப்போட்டியில் தோற்றப் பிறகு டூ பிளஸி பேட்டிகொடுத்தார். அதில், ''வருத்தமாக இருக்கிறது. மிடில் ஓவர்களில் லக்னோ அணி சிறப்பாக செயல்பட்டதால்தான் வெற்றியைப் பெற்றது. ஒரு பந்தில் ஒரு ரன் அடிக்க வேண்டும் என்ற நிலை வந்தபோது, ரன்அவுட் வாய்ப்பைத்தான் தேடிப்பிடித்து செய்திருக்க வேண்டும். நிகோலஸ் பூரன், மார்க்கஸ் ஸ்டாய்னிஸ் இருவரும்தான் எங்களது வெற்றி வாய்ப்பை தட்டிப்பறித்துவிட்டனர்''

''குறிப்பாக, எங்களது அணியின் மெய்ண் பௌலர் ஹர்ஷல் படேலை அவர்கள் டார்கெட் செய்து ரன்களை குவித்தார்கள். கோலி, நான், மேக்ஸ்வெல் ஆகிய டாப் ஆர்டர் பேட்டர்கள் சிறப்பாக செயல்பட்டது மகிழ்ச்சியாக இருக்கிறது. அடுத்தடுத்தும் இது தொடர வேண்டும் என விரும்புகிறேன்'' என்றார்.