LSG vs PBKS: 'தோனி, கோலி சாதனையை'...முறியடித்த கே.எல்.ராகுல்: கடைசி வரை ட்விஸ்ட்: பஞ்சாப் வெற்றி!

ஐபிஎல் 16ஆவது சீசன் 21ஆவது லீக் போட்டியில் பஞ்சாப் கிங்ஸ், லக்னோ சூப்பர் ஜெய்ண்ட்ஸ் ஆகிய அணிகள் மோதின. லக்னோவில் நடைபெற்ற இப்போட்டியில் பஞ்சாப் அணி டாஸ் வென்று பந்துவீச்சைத் தேர்வு செய்தது.

லக்னோ இன்னிங்ஸ்:

முதலில் களமிறங்கிய லக்னோ சூப்பர் ஜெய்ண்ட்ஸ் அணியில் ஓபனர், கேப்டன் கே.எல்.ராகுல் 56 பந்துகளில் 8 பவுண்டரி, ஒரு சிக்ஸர் உட்பட 74 ரன்களை குவித்து அசத்தினார். இதனைத் தொடர்ந்து கைல் மேய்ர்ஸ் 29 (23), க்ருனால் பாண்டியா 18 (17), மார்க்கஸ் ஸ்டாய்னிஸ் 15 (11) ஆகியோர் ஓரளவுக்கு சிறப்பாக செயல்பட்டனர்.

கே.எல்.ராகுலை தவிர வேறு எந்த பேட்டரும் அதிரடி காட்டாததால், லக்னோ அணி 20 ஓவர்கள் முடிவில் 159/8 ரன்களை மட்டும்தான் சேர்த்தது.

பஞ்சாப் கிங்ஸ் இன்னிங்ஸ்:

இலக்கை துரத்திக் களமிறங்கிய பஞ்சாப் கிங்ஸ் அணியில் ஓபனர்கள் அதர்வா டைட் 0 (3), ப்ரப்சிம்ரன் சிங் 4 (4) ஆகியோர் படுமோசமாக சொதப்பினார்கள்.

இதனைத் தொடர்ந்து மேத்யூ ஷார்ட் 34 (22), ஹர்பிரித் சிங் 22 (22), சிக்கந்தர் ராசா 57 (41) ஆகியோர் அணியை வெற்றிநோக்கி அழைத்துச் சென்றனர். இறுதியில் 2 ஓவர்களில் 20 ரன்கள் தேவைப்பட்டது. அப்போது, மார்க் உட், ரவி பிஷ்னாய் ஓவர்களில் ஷாருக்கான் அதிரடியாக விளையாடினார். இதனால், பஞ்சாப் அணி 19.3 ஓவர்கள் முடிவில் 161/8 ரன்களை சேர்த்து, 2 விக்கெட்கள் வித்தியாசத்தில் வெற்றியைப் பெற்றது.

ஷாருக்கான் 10 பந்துகளில் ஒரு பவுண்டரி, 2 சிக்ஸர்கள் உட்பட 23 ரன்களை சேர்த்து கடைசிவரை களத்தில் இருந்தார்.

கே.எல்.ராகுல் சாதனை:

இப்போட்டியில் ராகுல் 74 ரன்களை அடித்ததன் மூலம், ஐபிஎலில் 4000 ரன்களை அதிவிரைவாக கடந்த வீரர் என்ற மெகா சாதனையை கே.எல்.ராகுல் படைத்துள்ளார். ராகுல் 105 இன்னிங்ஸ்களில் இந்த சாதனையை படைத்துள்ளார். கிறிஸ் கெய்ல் (112), வார்னர் (114), கோலி (128) ஆகியோர் அடுத்தடுத்த இடங்களில் இருக்கிறார்கள்.