CSK: 'பிட்னஸுடன் இருக்கும் பென் ஸ்டோக்ஸ்'...யாருக்கு மாற்று? மைக் ஹசி ஓபன் டாக்!

ஐபிஎல் 16ஆவது சீசனின் இன்றைய லீக் ஆட்டத்தில், புள்ளிப் பட்டியலில் 2ஆவது இடத்தில் இருக்கும் சென்னை சூப்பர் கிங்ஸும், கடைசி இடத்தில் இருக்கும் டெல்லி கேபிடல்ஸ் ஆகிய அணிகளும் மோதவுள்ளன.

டெல்லி கேபிடல்ஸ் அணி முதல் ஐந்து போட்டிகளில் தோல்விகளை தழுவி சொதப்பியது. இருப்பினும், அதன்பிறகு அதிரடியாக கம்பேக் கொடுத்து அடுத்த 5 போட்டிகளில் 4 வெற்றிகளை பெற்று சரியான பார்மில் இருக்கிறது.

நேருக்கு நேர்:

ஆனால், சென்னை சூப்பர் கிங்ஸ் அணியை அதனின் சொந்த மண்ணில் வீழ்த்துவது அவ்வளவு எளிது கிடையாது. டெல்லி அணி 8 முறை சிஎஸ்கேவை சேப்பாக்கத்தில் சந்தித்து, அதில் இரண்டு முறை மட்டும்தான் வென்றுள்ளது.

பிளே ஆப் வாய்ப்பு:

சிஎஸ்கே இன்றைய போட்டியில் வெற்றிபெறும் பட்சத்தில், பிளே ஆப் வாய்ப்பை கிட்டதட்ட உறுதிசெய்துவிடும். இதனால், இன்றைய ஆட்டம் சிஎஸ்கேவுக்கு மிகமுக்கியமானதாக இருக்கிறது. மேலும், அதிக நெட் ரன்ரேட் வித்தியாசத்திலும் வெற்றிபெற்றாக வேண்டும். டெல்லி அணி வீரர்கள் அக்சர் படேல், குல்தீப் யாதவ் ஆகியோர் சிறப்பாக பந்துகளை சுழற்றக் கூடியவர்கள் என்பதால், இந்த இருவரும்தான் சிஎஸ்கேவுக்கு பெரும் தலைவலியாக இருப்பார்கள் எனக் கருதப்படுகிறது.

பென் ஸ்டோக்ஸ் பிட்னஸ்:

இந்நிலையில், காயம் காரணமாக அவதிப்பட்டு வந்த பென் ஸ்டோக்ஸ் தற்போது முழுவதுமாக குணமடைந்துவிட்டதாக, சென்னை சூப்பர் கிங்ஸ் அணியின் பேட்டிங் பயிற்சியாளர் மைக் ஹசி தெரிவித்துள்ளார்.

இதுகுறித்து பேசிய ஹசி, ''பென் ஸ்டோக்ஸ் தற்போது முழு பிட்னஸுடன் இருக்கிறார்'' எனக் கூறினார். இதனைத் தொடர்ந்து அவர் டெல்லிக்கு எதிராக களமிறங்குவாரா? எனக் கேட்டபோது, ''சிஎஸ்கேவின் பிளேயிங் லெவன் தற்போது சிறப்பாக இருக்கிறது. அதில் மாற்றம் செய்யவேண்டிய அவசியம் இல்லை என்பதால், பென் ஸ்டோக்ஸ் டெல்லிக்கு எதிராக களமிறங்க வாய்ப்பில்லை'' எனக் கூறினார்.