SRH: ‘பூரனுக்கு மாற்று வீரர்'...கேப்டன் வீரர்..இருவருக்கும் 21 கோடியை காலி செய்த சன் ரைசர்ஸ்...சரியான தேர்வுதான்!

ஐபிஎல் 16ஆவது சீசனுக்கான ஏலம், கொச்சியில் துவங்கி நடைபெற்று வருகிறது.

இதற்காக மொத்தம் 991 வீரர்கள் பதிவு செய்து வைத்திருந்தார்கள். இருப்பினும், அவர்களில் 369 வீரர்களை மட்டுமே ஐபிஎல் நிர்வாகிகள் தேர்வு செய்துள்ளனர்.

இதுதவிர 10 அணிகளும், தங்களுக்கு தேவையான இளம் வீரர்களை ஏலப் பட்டியலில் சேர்க்க கோரிக்கைவிட்டுள்ளது. அந்த வகையில் 36 பேர் பேர் கூடுதலாக மொத்தம் 405 பேர் மினி ஏலத்தில் பங்கேற்க உள்ளனர். இதில் 273 பேர் இந்திய வீரர்களாகவும், 132 பேர் வெளிநாட்டு வீரர்களாகவும் இருக்கிறார்கள். 4 பேர் பக்கத்து நாடு என்ற சலுகை காரணமாகவும் பங்கேற்றுள்ளனர்.

ஹேரி ப்ரூக்:

இங்கிலாந்து அணியின் அதிரடி பேட்டர் ஹேரி ப்ரூக்கை சன் ரைசர்ஸ் ஹைதராபாத் அணி 13.25 கோடி கொடுத்து வாங்கியுள்ளது.

இங்கிலாந்து அணியின் 23 வயதே ஆகும் அதிரடி பேட்டர் ஹேரி ப்ரூக்ஸ், சமீபத்தில் பாகிஸ்தானுக்கு எதிரான 7 போட்டிகள் கொண்ட டி20 தொடரில் மிரட்டலாக விளையாடி ரன்களை குவித்தார். மேலும் தற்போது, பாகிஸ்தானுக்கு எதிரான மூன்று டெஸ்ட்களிலும் சதம் அடித்து அசத்தியுள்ளார். ஆசிய மண்ணில் இப்படி முரட்டு பார்மில் இருக்கும் ஒரு இளம் வீரரை எந்த அணிதான் வேண்டாம் எனக் கூறும்? நிச்சயம் 10+ கோடிகளில் ஏலம் போவார் எனக் கருதப்பட்டது.

இந்நிலையில், மிடில் வரிசையில் பூரனுக்கு மாற்றாக சன் ரைசர்ஸ் அணி இவரை வாங்கியுள்ளது.

மயங்க் அகர்வால்:

இதனைத் தொடர்ந்து மயங்க் அகர்வாலையும் சன் ரைசர்ஸ் அணி 8.25 கோடிக்கு வாங்கியுள்ளது. இதன்மூலம் ஓபனர் பிரச்சினை, கேப்டன் பிரச்சினை தீர்ந்துள்ளதாக கருதப்படுகிறது.